Արմեն Մարտիրոսյանին ներկայացված մեղադրանքն ակնհայտ ապօրինի է, հորինված, հեքիաթի նման մեղադրանք է. պաշտպան
«Ժառանգություն« կուսակցության փոխնախագահ Արմեն Մարտիրոսյանին առաջադրված մեղադրանքը` զանգվածային անկարգությունների կազմակերպում, ակնհայտ ապօրինի է, քանի որ կան տեսանյութեր: Ավելին` այն շինծու ու հեքիաթի նման մեղադրանք է: Լրագրողների հետ զրույցում նման իրավական գնահատական տվեց նրա պաշտպան Գիվի Հովհաննիսյանը:
«Առաջինը` զանգվածային անկարգություններ չեն եղել, դա Ոստիկանությունն է հարձակվել ժողովրդի վրա և ծեծել, և տեսանյութերում երևում է, որ Արմեն Մարտիրոսյանը միջոցներ է ձեռնարկում, բանակցում ոստիկանների հետ, որ բախումներ չլինեն»,- ներկայացրեց պաշտպանը։
Հիշեցնենք, որ Արմեն Մարտիրոսյանը, որը կալանավորվել է 225-րդ հոդվածի առաջին մասով / զանգվածային անկարգությունների կազմակերպում/, չի ընդունում մեղադրանքը:
Ըստ փաստաբանի` նման մեղադրանքների առաջադրման նպատակն այն է, որպեսզի մարդկանց հեռու պահեն հանրահավաքներից ու բողոքի ակցիաներից: Ըստ Գիվի Հովհաննիսյանի` իր պաշտպանյալին, Անդրիաս Ղուկասյանին ու Դավիթ Սանասարյանին մեկուսացնելով ու «հանրահավաքների ժամանակ սադրիչներ ներդնելով`փորձելու են այնպես անել, որ հասարակությունն էլ ենթարկվի սադրանքների»:
Սա, ըստ փաստաբանի, նպատակ ունի հասարակությանը ցույց տալ, որ գործ ունեն ոչ թե քաղաքական ու քաղաքացիական իրավունքների համար պայքարողների, այլ՝ քրեական հանցագործների հետ: