Վարչապետի ելույթը չեմ ընկալում որպես իմ տարիների աշխատանքի քննադատություն. Արմեն Աշոտյան
Վարչապետի ելույթը չեմ ընկալում որպես իմ տարիների աշխատանքի քննադատություն: Իմ աշխատանքի գնահատականը հնչել է ԿԳՆ-ում, երբ պարոն Աբրահամյանը ներկայացնում էր նորանշանակ նախարարին, և այդ գնահատականը բարձր էր ու անկեղծ: Այս մասին Tert.am-ի հետ զրույցում ասաց ՀՀԿ կուսակցության փոխնախագահ, Կրթության և գիտության նախկին նախարար Արմեն Աշոտյանը` անդրադառնալով ՀՀ վարչապետ Հովիկ Աբրահամյանի ելույթին, թե կրթական համակարգի բարեփոխումներն ավելի քան պահանջված են կրթական ոլորտի բոլոր մակարդակներում:
«Կրթության ոլորտի խնդիրների մասին կարելի է երկար խոսել: Դրանք եղել են, կան և, ցավոք, կլինեն: Բազմաթիվ հարցեր այս տարիներին լուծվել են, սակայն առկա մարտահրավերների ճնշող մեծամասնությունն ավանդական խնդիրներ են, որոնց լուծման համար լրացուցիչ ֆինանսական և կազմակերպչական մեծ ջանքերի կարիք կա»,-ասաց Աշոտյանը:
Արմեն Աշոտյանը նշեց նաև, որ ուրախ է, որ Կառավարությունը պատրաստ է այս փուլում այդ ջանքերը գործադրել, հատկապես, ֆինանսավորման մասով.«Ուստի միայն հաջողություններ եմ մաղթում Կառավարությանը կրթության ոլորտի առաջնահերթ հիմնախնդիրների լուծման շարունակական գործում»։
Կրթության և գիտության նախկին նախարարը հիշեցրեց, որ իր պաշտոնավարման ավարտին ԿԳ նախարար Լևոն Մկրտչյանին նվիրել է հուշանվեր-քար, որին գրված է հին լատինական ասույթ՝ ես արել եմ, ինչ կարողացել եմ, ով կարող է, թող անի ավելին: