Լարսում վերջնական վտանգը վերացված չէ, որովհետև սարերի վրա մոտ 5 մլն տոննա սողացող հող կա. Գագիկ Բեգլարյան
ՀՀ կառավարության նիստին տրանսպորտի և կապի նախարար Գագիկ Բեգլարյանը հայտարարեց, որ այսօրվանից մեքենաները ցերեկային ռեժիմով կանցնեն Վերին Լարսի անցակետի ճանապարհով:
«Ամենաշատը չորս-հինգ օր հետո ընդհանրապես ռեժիմը կլինի 24-ժամյա»,-ասաց նա:
Նա նշեց, որ վրացական կառավարության կողմից անհանգստություն կա, որ վերջնական վտանգը վերացված չէ, որովհետև այս պահին սարերի վրա մոտ հինգ մլն տոննա հոսելու հնարավորություն ունեցող հող կա:
«Մտածում են ապագայում այդ ճանապարհի վերգետնյա թունել կառուցեն, որը բավականին մեծ ծախսերի հետ է կապված: Համենայնդեպս այս ճանապարհը մեզ համար միշտ լինելու է վտանգավոր, յուրաքանչյուր անձրևից հետո հնարավոր է՝ ունենանք այս խնդիրները»,-ասաց նա:
Նախարարը գործարարներին հորդորեց, որ լաստանավի հնարավորությունը ամեն րոպե իրենց աշխատանքների հետ համատեղ ունենան աչքի առաջ:
«Ամեն րոպե Լարսը հնարավոր է փակվի»,-ասաց նա։
Վարչապետ Հովիկ Աբրահամյանն էլ նշեց, այժմ արդեն ժամանակն է, որ բանակցեն այլընտրանքային ճանապարհի մտածելու մասին: