Ռուսաստանում մեկնարկել է Հեռավոր Արևելքում հողատարածքների անվճար տրամադրման ծրագիրը
Այսօրվանից Ռուսաստանի Դաշնությունում ուժի մեջ է մտել «հեռավորարևելյան հեկտարի» մասին օրենքը, որը ՌԴ նախագահ Վլադիմիր Պուտինը ստորագրել էր 2016թ. մայիսի 2-ին, գրում է РБК-ն։
Դաշնային օրենքը ենթադրում է, որ յուրաքանչյուր քաղաքացի կարող է անվճար Հեռավոր Արևելքում մեկ հա հողատարածք ստանալ, որը գտնվում է պետական կամ համայնքային սեփականության ներքո:
Անվճար հողատարածքը հնարավոր կլինի ստանալ Յակուտիայում, Կամչատկայում, Խաբարովսկի և Պրիմորիեի երկրամասերում, Ամուրի, Մագադանի և Սախալինի մարզերում, Հրեական ինքնավար շրջանում, ինչպես նաև՝ Չուկոտկայում:
Հողատարածքը կարելի է ձեռք բերել ինքնուրույն` գրանցվելով համապատասխան կայքում: Տարածքն անհատույց օգտագործման կտրվի 5 տարով, այնուհետև այն հնարավոր կլինի վարձակալել կամ ստանալ որպես սեփականություն: Հողը հնարավոր կլինի առգրավել, եթե այն չօգտագործվի: