Գլխավոր հարցը եղել և շարունակում է մնալ բաց շուկաներ ապահովելը. Արծվիկ Մինասյանն անդրադարձել է վարչապետի...
ՀՀ էկոնոմիկայի նախարար Արծվիկ Մինասյանն այսօր լրագրողների հետ զրույցում անդրադառնալով վարչապետ Հովիկ Աբրահամյանի հայտարարությանը, թե կառավարությունը բավարար հետևողական չի եղել մենաշնորհների խնդրի էության ամբողջական բացահայտման հարցում և ժամանակին չի նախաձեռնել բաց հանրային երկխոսություն, ասաց, թե առաջին հերթին օրենսդրական վերանայումների անհրաժեշտություն կա:
«Հաջորդը՝ գործիքակազմի վերանայումներ և փոփոխություններ, այդ թվում՝ նաև լիազոր մարմինների և իրավասությունների հստակեցում: Չորրորդը՝ կոնկրետ այն մարմինները, որոնք իրենց ոլորտներում ունեն այնպիսի ծառայություններ մատուցող սուբյեկտներ, որոնք մասնավոր սեկտորում կարող են գերիշխող կամ մենաշնորհային դիրք ունենալ, պետք է սկսել նաև այդ սուբյեկտների շուկայում մրցակցային պայմանների ստեղծումից»,-ասաց Արծվիկ Մինասյանը:
Նախարարն ասաց, թե գլխավոր հարցը եղել և շարունակում է մնալ բաց շուկաներ ապահովվելը. «Եթե շուկայում որոշակի անկանոն կամ ոչ օրինական գործողությունների, կամ թեկուզ օրինական, բայց մրցակցային վիճակը և գնագոյացման համակարգը խեղաթյուրող երևույթներ են, դրանք ածանցվում են շուկաների բաց չլինելու հանգամանքին: Այսինքն՝ առաջին խնդիրը շուկաները բաց պահելն է»:
Շարունակելով խոսքը՝ Արծվիկ Մինասյանն ասաց, թե երբ խոսվում է մենաշնորհի առաջացման մասին, առաջին հերթին պետք է գիտակցել, որ եթե շուկայի մուտքը լինի բաց, ապա մրցակցային միջավայրը կարող է ձևավորվել շատ արագ:
Հիշեցնենք, որ կառավարության նիստում վարչապետն իր հայտարարության մեջ ասաց հետևյալը. «Հանձնարարում եմ էկոնոմիկայի նախարարին և առաջարկում եմ տնտեսական մրցակցության պաշտպանության հանձնաժողովին, Հայաստանում գործող տարբեր միջազգային կառույցների ներգրավմամբ, ամենասեղմ ժամկետում՝ առավելագույնը երեք շաբաթվա ընթացքում, վերլուծել Հայաստանում առկա մենաշնորհները, դրանց ազդեցությունը ազատ մրցակցային պայմաններ ունենալու վրա և առաջարկել արդյունավետ լուծումները, որոնք կարող են շտկել ստեղծված իրավիճակը»: