Մեր զինվորներն ավելի պատրաստված են և խելացի, քան նրանց վարձկանները. վիրավորում ստացած զինծառայողներ
Թալիշի շրջանում հակառակորդի կրակոցից վիրավորված սպա Մուրադ Մուրադյանը իր բուժումը շարունակում է ՊՆ Կենտրոնական կլինիկական զինվորական հոսպիտալում: Tert.am-ի հետ զրույցում նա պատմեց, թե ինչպես է վիրավորում ստացել: «Անձնակազմի զինամթերքը վերջացել էր և ականանետից կրակեցին ու ստացա հրազենային վիրավորում աջ ոտքի հատվածում: Վիրավորումից հետո երկուսուկես ժամ մնացել ենք գետնատնակում, հակառակորդի ռմբակոծումից չէինք կարողանում դուրս գալ»,- ասաց նա և նշեց, որ այնուհետև զինվորների տեղափոխումից հետո անձնակազմը դուրս բերեց նաև իրեն:
Մուրադ Մուրադյանը նշեց, որ իր հետ վիրավորում է ստացել նաև երկու ժամկետային զինծառայող: «Ապաքինվելուց հետո էլի գնալու եմ նույն տեղը ծառայությունս շարունակելու»,- ասաց նա:
Նա պատմեց, որ ամեն օր խոսում է իր ծառայակից ընկերների հետ, որոնք «դուխով» շարունակում են պահել դիրքերը: «Մեր հակառակորդի համար մեր զինվորներն ավելի «դուխով» են, քան իրենց ուղարկած վարձկանները: 18 տարեկան տղաները վազում էին նրանց հետևից, բայց նրանք փախնում էին տանկերով, որովհետև մեր զինծառայողներն ավելի պատրաստված են և խելացի »,-ասաց նա և նշեց, որ հիմնականում այդ վարձկանները 30 և ավելի տարիքի տղամարդիկ էին:
Ապրիլի 5-ին վիրավորված Բենիկ Եղիազարյանը նշեց, որ հիմա իրեն լավ է զգում: Նա պատմեց, որ վիրավորում ստացել է երբ դուրս է եկել սնունդ ստանալու և հակառակորդը ականանետով կրակ է բացել:
Նրա ծառայությունից անցել է արդեն 15 ամիս և ապաքինվելուց հետո նորից պատրաստվում է շարունակել ծառայությունը՝միանալ տղաներին: «Բոլորն էլ «դուխով» են, մարտական, ոչ մեկն էլ չի վախենում, վախենալու բան էլ չկա»,- ասաց նա: Ինչ վերաբերում է նրան, թե ներկայիս երիտասարդությունը գերազանցել է ավագ սերնդին, զինվորն ասաց. «Ճիշտ են ասում»:
Հադրութում մարտական դիրքերում վիրավորում է ստացել նաև Վահան Սարգսյանը՝ որովայնի հատվածում, և հիմա ապաքինումը լավ է ընթանում: Նրա ծառայությունից անցել է 1 տարի 4 ամիս և նա ևս ապաքինումից հետո պատրաստվում է շարունակել ծառայությունը: «Կատարում էինք ինժեներական աշխատանքներ, երբ հակառակորդն անսպասելի սկսեց կրակել և պատահաբար դիպչեց ինձ»,- ասաց նա:
Չնայած դրան՝ նա նշեց, որ իր և ընկերների մարտական ոգին շատ բարձր է, և տղաները պատրաստ են ամեն պահի գնալ մինչև վերջ: «Հակառակորդի հետ մեր հարցերը պետք է լուծենք»,- ասաց նա:
Վահան Սարգսյանի մորաքույրը նշեց, որ Վահանն արդեն երկու անգամ վիրահատվել է, ներկայումս վիճակը կայուն է և դրական առաջընթաց կա: «Ապրիլի 1-ին դպրոցում եմ իմացել դեպքի մասին, ծնողները հեռվում էին, ամենադժվարը լուրն իրենց հայտնելն էր, և մինչ նրանց վերադառնալը սարսափելի բաների միջով անցանք»,- ասաց նա և նշեց, որ հենց դեպքի օրը, մի քանի ժամ առաջ է Վահանի հետ խոսել և ամեն ինչ լավ էր, տրամադրությունը բարձր, թեև նշեց, որ հիմա էլ ընկճված չէ:
Մարտակերտում ոտքի հատվածում հրազենային վիրավորում է ստացել նաև Էդգար Մխիթարյանը, ով ևս հիմա ավելի լավ է և ապաքինվում է: Ինչ վերաբերում է հակառակորդին, ապա նա ասաց. «Թշնամին նույն թշնամին է, գնդակը կկպնի, թե՝ ոչ, ուղղակի գնդակը կպնելուց հետո ավելի վատ ես տրամադրվում , ուզում ես վրեժխնդիր լինել»,- ասաց նա: Նա նշեց, որ հոսպիտալում այցելուներ շատ-շատ է ունենում: «Բոլորին՝ ընկերներիս, բարեկամներիս, հատկապես դիրքերում ծառայություն իրականացնող տղերքին, ջերմ-ջերմ բարևում եմ, մինչև ապաքինվենք, միանանք իրենց ու շարունակենք ծառայությունը»,- ասաց նա:
Tert.am-ը զրուցեց նաև վիրաբուժական բաժանմունքի ավագ բուժքույր էդմիլա Աթանեսյանի հետ: Նա նշեց, որ այդ պահին իրենց բաժանմունքում չորս շարքային, մեկ պայմանագրային շարքային և մեկ սպա է բուժվում և ներկայումս նրանց առողջական վիճակը գնահատվում է բավարար: «Կարծես պարտավորվածության զգացումը ավելի է մեծանում քո մեջ, երբ դու տեսնում ես երիտասարդ տղաների, որոնք սահմանի պաշտպաններ են, և քո ապահովությունն են պահում, ու ավելի մեծ ջանքեր ենք ներդնում նրանց ապաքինման համար»,- ասաց նա և նշեց, որ տղաների տրամադրությունը բարձր է, շատ ուրախ են, ժպիտները դեմքին:
