Մոսկվան և Անկարան սկսել են Թուրքիայում գազային հանգույցի նախագծի իրականացումը. «Գազպրոմ»-ի ղեկավար
«Գազպրոմ»-ի ղեկավար Ալեքսեյ Միլերը կոնֆերանսի ժամանակ ասել է, որ Ռուսաստանն ու Թուրքիան սկսել են Թուրքիայում գազային հանգույցի նախագծի գործնական իրականացումը։ Այս մասին հայտնում է ՏԱՍՍ-ը։
«Այժմ մենք Թուրքիայի հետ սկսել ենք աշխատել այս երկրում գազային հանգույցի նախագծի վրա: Այս որոշումն ընդունվել է երկու պետությունների ղեկավարների մակարդակով, և մենք արդեն սկսել ենք դրա գործնական կիրառումը»,- ասել է նա:
Միլերի խոսքով՝ գազային հանգույցը հնարավորություն կտա ապահովել բնական գազի շուկայում «թափանցիկ և արդար» գնագոյացում։
Ավելի վաղ ՌԴ փոխվարչապետ Ալեքսանդր Նովակը հայտարարել էր, որ Ռուսաստանը եվրոպացի սպառողների հետ քննարկում է Թուրքիայի տարածքով գազի մատակարարումների ավելացումը՝ այս երկրում հանգույցի ստեղծումից հետո, ինչպես նաև պատրաստ է վերսկսել գազի մատակարարումը տարածաշրջան «Յամալ-Եվրոպա» գազատարով:
Բացի այդ, Թուրքիայի նախագահ Ռեջեփ Թայիփ Էրդողանը հայտարարել է, որ Անկարան մտադիր է դառնալ Միջերկրական ծովի ավազանից, Կասպից ծովից և Մերձավոր Արևելքից Եվրոպա էներգակիրների մատակարարման կենտրոն։