Այս հակամարտությունը դադարեցնելու ուժը Ձեր ձեռքերում է՝ այն ձեռքերում, որոնք սեղմել եմ Մոսկվայում. Պելեն բաց նամակ է գրել Պուտինին
Բրազիլացի ֆուտբոլիստ Պելեն բաց նամակ է գրել ՌԴ նախագահ Վլադիմիր Պուտինին՝ կոչ անելով «դադարեցնել ներխուժումն Ուկրաինա»։ Նամակը հրապարակվել է Instagram-ում:
Պելեն իր գրառումը հրապարակել է ԱԱ-2022-ի փլեյ-օֆֆի կիսաեզրափակիչում Ուկրաինա-Շոտլանդիա խաղից առաջ։
«Մի քանի րոպեից Ուկրաինան կանցկացնի իր առաջին պաշտոնական հանդիպումը հակամարտության սկզբից ի վեր։ Ես անձամբ եմ գրել այս նամակը և հուսով եմ, որ բռնությունները կդադարեն, և մենք միասին կարող ենք ավելի լավ աշխարհ կառուցել»,- ասվում է Պելեի հայտարարության մեջ:
Բռնությունը արդարացում չունի, ընդգծել է լեգենդար մարզիկը:
«Այս հակամարտությունը, ինչպես բոլոր մյուսները, անբարոյական է, չարդարացված և ցավից, վախից, սարսափից և տանջանքից բացի ոչինչ չի բերում: Ոչ մի պատճառ չկա, որ այն շարունակվի... Երբ մենք հանդիպեցինք և փոխանակվեցինք լայն ժպիտներով, որին հաջորդեց երկար ձեռքսեղմումը, անհնար էր պատկերացնել, որ մի օր մենք կարող ենք այնքան բաժանված լինել, որքան այսօր»,- գրել է Պելեն:
«Այս հակամարտությունը դադարեցնելու ուժը Ձեր ձեռքերում է։ Հենց այն ձեռքերում, որոնք ես սեղմել եմ Մոսկվայում՝ 2017 թվականի մեր վերջին հանդիպմանը»,- գրել է ֆուտբոլիստը։