Սինձո Աբեն COVID-19-ի դեմ դեղամիջոց և պատվաստանյութ ստեղծելու համար 800 մլն դոլար է խոստացել
Ճապոնիայի վարչապետ Սինձո Աբեն 800 մլն դոլար է խոստացել COVID-19 կորոնավիրուսի դեմ դեղամիջոցի և պատվաստանյութի մշակման համար, հաղորդում է NHK հեռուստաալիքը։
«Նոր կորոնավիրուսի դեմ պայքարում անհրաժեշտ է միջազգային համագործակցություն։ Իրավիճակը փոխելու համար հեռանկարում առաջնային խնդիրն է դեղի մշակումը, իսկ հետո՝ պատվաստանյութը», - ընդգծել է Ճապոնիայի կառավարության ղեկավարը։
Նրա խոսքով՝ 800 միլիոն դոլարից 234 միլիոնը կգնա, մասնավորապես, համավարակի պատրաստվածության ապահովման ոլորտում նորարարությունների կոալիցիային (CEPI):
Աբեն միջազգային հանրությանը կոչ է արել «համախմբվել և հաղթահարել այս ճգնաժամը»:
«Վարակիչ հիվանդությունների համար սահմաններ չկան»,- ընդգծել է նա։
Ճապոնիայում COVID-19 կորոնավիրուսով վարակվածների թիվը հասել է 15 078-ի, մահացել է 536 մարդ:
Առողջապահության համաշխարհային կազմակերպությունը մարտի 11-ին նոր կորոնավիրուսը համավարակ էր հայտարարել: Վերջին տվյալներով՝ աշխարհում գրանցվել է վարակման 3 646 211 դեպք, 252 407-ը՝ մահվան ելքով, ապաքինվել է 1 200,170 մարդ։ Համաճարակի օջախ Չինաստանի սահմաններից դուրս վարակը տարածվել է 212 երկրում: