«Եթե այդ թիվը համապատասխանի իրականությանը, ես հրաժարական կներկայացնեմ». իրանցի փոխնախարարը հերքել է Ղոմում կորոնավիրուսից մահվան 50 դեպքի մասին լուրերը
Իրանական Ղոմ քաղաքում նոր տեսակի կորոնավիրուսից մահվան 50 դեպքի մասին լուրերն իրականությանը չեն համապատասխանում, հայտնում է «ՌԻԱ Նովոստի» գործակալությունը` հղում տալով Իրանի առողջապահության փոխնախարար Իրաջ Հարիրչիի հայտարարությանը:
Հարիրչին ավելի վաղ հայտնել էր, որ Իրանում կորոնավիրուսով վարակման դեպքերի թիվը մոտ 60 է:
«Հայտնել եք մահվան ելքով 50 դեպքի մասին, պաշտոնապես հայտնե՛ք նրանց անուները: Հայտարարվել է 50 դեպքի մասին, սակայն ես պարզ կասեմ, որ եթե Ղոմում մահացածների թիվն այդ նշած թվի կեսը կամ քառորդը լինի, ապա ես հրաժարական կներկայացնեմ»,- հայտարարել է նա իրանական հեռուստաեթերում:
Ավելի վաղ ISNA գործակալությունը հայտնել էր, որ Ղոմից Ահմադ Ամիրաբադի անունով մի պատգամավոր հայտարարել է, որ առողջապահության նախարարի խոսքերն իրականությանը չեն համապատասխանում: Նրա խոսքով` «կորոնավիրուսը Ղոմում հայտնաբերվել է երեք շաբաթ առաջ», միևնույն ժամանակ իշխանությունները վարակման առաջին երկու դեպքի մասին հասարակությանը տեղյակ են պահել միայն փետրվարի 19-ին:
Խորհրդարանականը նշել է, որ քաղաքում իրավիճակն «ասվածից ավելի վատ է»:
Պաշտոնական տեղեկություների համաձայն` Իրանում կորոնավիրուսի տարածումը սկսվել է հենց Ղոմ քաղաքից, որը շիաների սուրբ քաղաքն է համարվում և որտեղ վերջիններս ուխտագնացության են մեկնում: Տվյալ պահին այս քաղաքում գրանցվել են վարակման ամենաշատ դեպքերը: