Վենետիկի հանձնաժողովը հավանություն է տվել ՍԴ այն մոդելին, որն ուզում ենք վերականգնել. ստացվում է, որ երկրորդ անգամ ենք ուզում ուղարկել կարծիքի. Լիլիթ Մակունց
Սահմանադրական փոփոխությունների հանրաքվեին ժողովուրդը պետք է ասի «այո», որ 2015թ.-ի Սահմանադրությամբ արձանագրված ՍԴ մոդելը վերականգնվի, և ՍԴ նկատմամբ ժողովրդի վստահությունը բարձրանա: Այս մասին «Ազատություն» ռադիոկայանի եթերում հայտարարել է ԱԺ «Իմ քայլը» խմբակցության ղեկավար Լիլիթ Մակունցը:
Նա նշեց՝ բարեփոխումների այն օրակարգը, որն իշխանությունն ունի այսօր, ի վերջո պետք է հաստատվի ՍԴ-ում, և երաշխավորված չեն, որ ՍԴ-ն այս կազմով կհաստատի այդ օրակարգը:
«Մեկ պարզ պատճառով՝ կան ողջամիտ կասկածներ, որ անկախ չեն գործում այն յոթ անդամները, որոնք այսօր որոշումներ են կայացնում ՍԴ-ում։ Նաև՝ ՀՀ քաղաքացին, գնալով հանրաքվեի և «այո» ասելով, համոզվածություն է հայտնում նաև հետագայի համար, որ հաջորդ ընտրություններին, ով էլ լինի իշխանության, որևէ քաղաքական ուժ, եթե անգամ փորձ կատարի կեղծելու որևէ ընտրություն կամ ժողովրդի քվեն, ՀՀ քաղաքացին պետք է համոզված լինի, որ ՍԴ-ն, որը կլինի հանրաքվեից հետո, որևէ կերպ չի սրբագրելու այդ կեղծիքները»,-ասաց նա։
Հարցին՝ իշխանությունը որտեղի՞ց է 650 000 մարդ բերելու ընտրատեղամասեր, Մակունցն արձագանքեց, թե երբ ասում են՝ «որտեղի՞ց եք մարդ բերելու», իր մոտ շատ վատ հիշողություններ և ասոցիացիաներ են առաջանում: «Մենք քաղաքացիների հետ պետք է անկեղծ զրուցենք քարոզարշավի ընթացքում, բաց ներկայացնենք այն, ինչը կա, այն, ինչ անհրաժեշտ է պետությանը, այն, ինչ անհրաժեշտ է ՀՀ յուրաքանչյուր քաղաքացուն, այն, ինչ անհրաժեշտ է Հայաստանի ժողովրդավարությունն անշրջելի դարձնելուն, և պիտի փորձենք համոզել, որ սա իսկապես կարևոր է, և մենք պիտի գնանք հանրաքվեի և ասենք «այո»»,-ասաց նա՝ նշելով նաև, թե հիմք է դրվում դատական իշխանության երաշխավորված անկախությանը, որովհետև ՍԴ անկախությունը դառնում է անկյունքարային հարց նաև դատական իշխանության բոլոր ատյաններում այդ անկախությունն ապահովելու գործընթացում:
Դիտարկմանը, թե մի շարք ընդդիմադիրներ ասում են՝ եթե 650 000 քաղաքացի «այո» ասի, ուրեմն՝ հանրաքվեն կեղծված է, Մակունցն արձագանքեց. «Այն ուժը, որը ձևավորվել է 2018թ.-ի գարնանը, այն արժեքներով, որոնցով եկել ենք, այն ընտրությունները, որոնք եղել են 2018թ.ի դեկտեմբերին, բացառվում է, որ որևէ կերպ մենք գնանք կեղծիքների: Դա մեր մեջ գենետիկորեն չկա, մենք գենետիկորեն մեր ամբողջ գիտակցական կյանքում պայքարել ենք հենց կեղծիքի դեմ, և բացառվում է, որ նման բան տեղի ունենա: Իսկ եթե կլինեն անհատներ, խմբեր, քաղաքական ուժեր, որոնք կփորձեն գնալ նման քայլերի՝ դրանով արատավորելով ժողովրդավարական այն ուղին, որը մենք որդեգրել ենք, ապա ես վստահ եմ, որ ոստիկանությունը և բոլոր պատկան մարմինները կձեռնարկեն բոլոր անհրաժեշտ քայլերը՝ այդ ամենը կանխելու և չեզոքացնելու համար»:
Անդրադառնալով սահմանադրական փոփոխությունների նախագիծը Վենետիկի հանձնաժողովի հավանությանն ուղարկելուն՝ Մակունցն ասաց, թե այդ առումով քաղաքական որոշում կայացնելու ժամանակ դեռ ունեն, ոչինչ չի բացառվում: «Բայց 2015թ.-ի Սահմանադրությունը ուղարկվել է բոլոր այն միջազգային կառույցներին, որոնք եզրակացություն տվել են, այդ թվում՝ Վենետիկի հանձնաժողովը հավանություն է տվել ՍԴ այն մոդելին, որն այսօր ուզում ենք վերականգնել, հետևաբար, ստացվում է, որ մենք երկրորդ անգամ ենք ուղարկում կարծիքի, որ ուզում ենք ունենալ այն ՍԴ-ն» :
Անդրադառնալով ՀՀ վարչապետ Նիկոլ Փաշինյանի և Գերմանիայի կանցլեր Անգելա Մերկելի հանդիպմանն ու համատեղ տարածած հայտարարությանը, որում խոսվում է Վենետիկի հանձնաժողովի մասին, և այն դիտարկումներին, թե հայտարարությունից մի հատված հանվել է հայերեն թարգմանությունից, Մակունցն ասաց, որ հայտարարության բովանդակությունն այն է եղել, որ Մերկելը ողջունել է այն բարեփոխումների օրակարգը, որն այսօր իրականացնում է ՀՀ-ն, մասնավորապես՝ դատաիրավական բարեփոխումները, նաև ողջունել է, որ Հայաստանը այդ օրակարգով աշխատում է այդ թվում Վենետիկի հանձնաժողովի հետ:
Ճշտող հարցին՝ այսինքն՝ որևէ հանդիմանություն չի եղել, թե փաստաթուղթն ինչո՞ւ չի ուղարկվում Վենետիկի հանձնաժողովի հավանությանը, Մակունցն արձագանքեց՝ ոչ:
Դիտարկմանը, թե ըստ ԱԺ «Լուսավոր Հայաստան» խմբակցության, հանրաքվեի նպատակը ՍԴ նախագահ Հրայր Թովմասյանից ազատվելն ու իշխանության համար հնազանդ դատարանն ընտրելն է, Մակունցն արձագանքեց.
«Այստեղ բացարձակապես ՍԴ անդամների անձերի հետ կապված հարց չէ: Հարցն այն է, որ ՍԴ-ն պետք է գործի 2015թ.-ին ընդունված Սահմանադրության համաձայն, այնպես, ինչպես մյուս սահմանադրական մարմինները: Մեզ համար անձերը, ՍԴ անդամները կարևորվում են այնքանով, որքանով պետք է երաշխավորվի իրենց անկախությունը, չեզոքությունը բոլոր քաղաքական ուժերից և անաչառությունը: Մենք ունենք ողջամիտ կասկածներ, որ ՍԴ առանձին անդամներ անկախ, անաչառ չեն գործում, ինչն արդեն ՀՀ-ի համար իրավական անվտանգության հարց է»: