Իրանի հետ առաջիկայում ՀՀ շփումները կլինեն ավելի ինտենսիվ, անգամ արտակարգ ռեժիմով, որպեսզի հասկանանք՝ կորոնավիրուսն ինչ ուղղությամբ է զարգանում. պատգամավոր
Մեր բարեկամ Իրանի հետ առաջիկա երկու շաբաթների ընթացքում շփումները կլինեն ավելի ինտենսիվ, անգամ արտակարգ ռեժիմով, որպեսզի հասկանանք՝ կորոնավիրուսն ինչ ուղղությամբ է զարգանում: Այս մասին լրագրողների հետ զրույցում ասաց ԱԺ «Իմ քայլը» խմբակցության պատգամավոր Գոռ Գևորգյանը՝ անդրադառնալով Հայաստան-Իրան սահմանի փակմանը՝ նշելով, թե չի կարծում, որ դա որևէ խնդիր կառաջացնի:
«Խոսքը վերաբերում է առաջին հերթին մարդկանց փոխադրումներին: Արդեն պաշտոնապես հրապարակում է արվել, որ բեռների փոխադրման դեպքում որևէ արգելանք չկա այս պահի դրությամբ: Արտակարգ ռեժիմով կհսկվեն վարորդները, որոնք բեռները տեղափոխում են: Օդային հաղորդակցությունը որոշակի սահմանափակմամբ կիրականացվի»,- ասաց պատգամավորը՝ ընդգծելով նաև, որ որևէ կերպ չեն արգելում, որ ՀՀ-ում գտնվող ԻԻՀ քաղաքացիները վերադառնան Իրան:
Ըստ Գևորգյանի՝ հետևողական են նաև, թե ինչպես կարող են օգտակար լինել հարևան հանրապետությանը և ինչպիսի համատեղ միջոցառումներ և գործողություններ կարող են ձեռնարկել, որ խնդրին ավելի համապարփակ լուծում տան:
Հարցին՝ ինչո՞ւ է երկշաբաթյա ժամկետ ընտրվել, պատգամավորը պատասխանեց, թե դա այն նախնական ժամանակահատվածն է, որը տրված է՝ հասկանալու համար, թե վիրուսի զարգացումն ինչ ծավալների է հասնում, և հարկ եղած դեպքում հարցը նորից քննարկման կդրվի:
«Այս պահին Հայաստանի Հանրապետությունը տիրապետում է բոլոր տեխնիկական միջոցառումներին՝ պարզելու և առաջին հերթին կանխարգելման միջոցառումների ցանկում ներառված գործողություններն իրականացնելու համար»,- նշեց Գևորգյանը:
Դիտարկմանը, թե մինչև վարչապետի՝ սահմանը փակելու մասին հայտարարությունը, որոշ իմքայլական պատգամավորներ նշում էին, թե քաղաքական ընդդիմադիրները փորձում են խուճապ տարածել՝ նաև սահմանադրական փոփոխությունների հանրաքվեն տապալելու նպատակով, Գևորգյանն արձագանքեց.
«Ես չեմ ուզում ծայրահեղականացնել ամեն ինչ, ուղղակի պետք է արձանագրենք, որ ցանկացած հարցի շուրջ խուճապը վատ բան է: Մանավանդ, երբ խոսքը պետական կառավարման համակարգի կողմից ձեռնարկված համապատասխան միջոցառումների մասին է, որոնք հստակ են և ունեն ճանապարհային մշակված քարտեզ: Այս հարցի շուրջ ցանկացած նմանատիպ շահարկումներ, որոնք, կարծում եմ, ոչ ամբողջությամբ հիմնովին են, բերում են հասարակության շրջանում տարակուսանքի առաջացման, որն անթույլատրելի և սխալ է»: