Փաշինյանը հարկատուների հաշվին իրականացնում է շրջագայելու իր երազանքները. գումարները վատնում է «վոյաժների» վրա. Միհրդատ Մադաթյանը՝ վարչապետի ԱՄՆ այցի համար 350․000 դոլար հատկացման մասին
Լուսանկարը՝ armeniasputnik.am-ի
ՀՀ վարչապետ Նիկոլ Փաշինյանի «Երկրի հակառակ կողմը» գիրքը ևս շրջագայության մասին է: Այս մասին Tert.am-ի հետ զրույցում ասաց հոգեբան Միհրդատ Մադաթյանը՝ անդրադառնալով վարչապետի ԱՄՆ այցի համար 350․000 դոլար հատկացմանը:
«Մարդը գրում է նրա մասին, ինչը չունի: Էռնեստ Հեմինգուեյը այդքան էլ խիզախ մարդ չէր, երբ գրում էր որսի, սաֆարիների և խիզախության մասին: Իր բոլոր գրվածքները խիզախության մասին են եղել, բայց իրականում Հեմինգուեյը բավականին դեպրեսիվ անձնավորություն էր և մի քանի անգամ ինքնասպանության փորձ է արել: Մարդը գրում է այն, ինչն իր կյանքում չի ունեցել, չի ստացել»,-ասաց նա:
Հոգեբանը հավելեց՝ վարչապետը հարկատուների գումարները վատնում է սեփական հաճույքների, «վոյաժների» համար, և նրան հետևում են Կառավարության մյուս անդամները, ԱԺ պատգամավորները, Նիկոլ Փաշինյանն ուղղակի իրականացնում է շրջագայելու իր անձնական երազանքները:
«Լոս Անջելեսում էլ հանրահավաքին Նիկոլ Փաշինյանն ասաց, որ այսօրվա կյանքը շրջագայություն է: Բնականաբար, սա մեծ ակցենտ է, որը նա դնում է իր կյանքում և իրականացնում է իր անձնական երազանքները: Փաստորեն, ես վճարում եմ Նիկոլ Փաշինյանի շրջագայությունների համար, բայց չեմ հասկանում՝ ինչո՞ւ նա հատուկ չվերթով գնաց ԱՄՆ: Չեմ հականում՝ ինչո՞ւ իմ վճարած գումարները ծախսեց դրա վրա, այլ ոչ շտապօգնության վարորդների աշխատավարձերի բարձրացման կամ ԱԻՆ աշխատակիցների աշխատավարձերը բարձրացնելու վրա, որն ինձ համար շատ ավելի էական և կարևոր նշանակություն կունենար»,- նշեց Միհրդատ Մադաթյանը:
Հիշեցնենք, որ ՀՀ վարչապետի մամուլի խոսնակ Վլադիմիր Կարապետյանը նախօրեին իր ֆեյբուքյան էջում գրառում էր կատարել առ այն, որ Նիկոլ Փաշինյանի աշխատանքային այցն ԱՄՆ կատարվել է չարթերային չվերթով, մասնավոր ընկերության միջոցով։ «Այցի կազմակերպման համար, ընդհանուր առմամբ, հատկացվող գումարը կարող է հասնել առավելագույնը 165 մլն դրամի, իսկ չարթերային չվերթի կազմակերպման նպատակը պայմանավորված է մի քանի հանգամանքներով»,- գրել էր վարչապետի մամուլի խոսնակը:
Վլադիմիր Կարապետյանը ավելի ուշ Tert.am-ին հայտնել էր, որ 165 մլն դրամը վերաբերում է ոչ թե ամբողջ այցի ընթացքում նախատեսվող ծախսերին, այլ միայն հատուկ չվերթին։
Միհրդատ Մադաթյանի խոսքով՝ մինչ վարչապետ դառնալը Նիկոլ Փաշինյանի վարած կյանքը, հավանաբար, կապ ունի բավականին շատ շրջագայելու, պաշտոնավարումից ի վեր մեկուկես տարվա ընթացքում մի քանի տասնյակ երկրներ այցելելու հետ: «Ես հասկանում եմ, որ մեր՝ հարկատուներիս գումարները վատնվում են սեփական հաճույքների համար: Այս մեկուկես տարվա ընթացքում Նիկոլ Փաշինյանի օրինակով կառավարության շատ անդամներ էլ են «վոյաժներ» անում: ԱԺ-ում էլ ունենք նման իրավիճակ՝ այլ երկրներ այցելությունների, «վոյաժների» մասով: Եվ հետաքրքիր է, որ մեր պրոդուկտիվությունն ընկնում է, որովհետև վերջնական արդյունքով մենք տեսնում ենք վատացած հարաբերություններ Ռուսաստանի հետ, ոչ մի նկատալի դրական տեղաշարժ Արևմուտքի հետ հարաբերություններում»,- ասաց նա:
Հոգեբանը նկատում է, որ հանրահավաքներում, ելույթներում Նիկոլ Փաշինյանի՝ խնայողության մասին հայտարարություններն իրականությանը չեն համապատասխանում. «Մենք տեսնում ենք ռեսուրսների անխնա օգտագործում: Այդ 165 մլն դրամի ադեկվատ արդյունք այդ գործուղումից, ակնհայտ է, որ ոչ մեկն էլ չի սպասում և աբսուրդ էլ կլինի սպասելը»,- նշեց նա:
«Այս մարդու ստրատեգիան, որն ինքը կիրառում է, դա իր առջև դրված, իր համար կարևոր նպատակների համար կամայական միջոցներ ծախսելն է անկախ նրանից՝ այդ միջոցները ադեկվատ են նպատակներին, թե ադեկվատ չեն: Նույն ձևով նա կամայականորեն իր նպատակն իրականացնում է քաղբանտարկյալ Ռոբերտ Քոչարյանին անազատության մեջ պահելով, նույնիսկ Ադրբեջանին խոսելու հնարավորություն տալով՝ հանրահավաքում կամայական հայտարարություններ է անում՝ «պոպուլյարություն» ձեռք բերելու համար: Նույն մոդելն է աշխատում այս բոլոր դեպքերում: Քանի որ մենք նախկինում ունեցել ենք այս մոդելի տարբեր արտահայտումները, այս պահին ես բոլորովին չեմ զարմանում այդ 165 մլն դրամի վրա: Կարող էր դա լինել 565 մլն դրամ և էլի չէի զարմանա, որովհետև մոդելն այսպիսին է: Կույր է պետք լինել՝ չնկատելու համար այս ստրուկտուրան: Նույն ձևով էլ նա եկավ իշխանության, որովհետև իշխանափոխության սկզբում էլ ասվեցին բաներ, որոնց գինն ավելի թանկ էր, քան այն արդյունքը, որը այս մեկուկես տարվա մեջ ունենք»,- ասաց Միհրդատ Մադաթյանը: