«Իմ Չի-Չին». Քիմ Քարդաշյանն «Էմմի» մրցանակաբաշխության ժամանակ ծաղրի ենթարկվելուց հետո հրապարակել է դստեր լուսանկարը. Daily Mail
Ամերիկյան Keeping Up With the Kardashians իրապատում շոուի աստղ Քիմ Քարդաշյանի` կիրակի օրն «Էմմի» հեռուստատեսային ոլորտում մրցանակաբաշխության շրջանակում կայացած մեծ բեմելն ավարտվել է հեռուստաաստղի նվաստացմամբ, գրում է Daily Mail-ը:
Այս հանգամանքը, սակայն, աստղին չի վհատեցրել. երկուշաբթի առավոտյան հեռուստաաստղն Instagram-ի իր էջում հրապարակել է փոքրիկ դստեր լուսանկարը` «Իմ Չի-Չին» գրառմամբ, որտեղ պատկերված է վազող, ժպտացող փոքրիկը: Լուսանկարում փոքրիկը թավշյա սպորտային հագուստ է կրում:
Կիրակի Քիմը «Էմմի» մրցանակաբաշխության հաղթողներից մեկին հայտարարելու համար բեմ է բարձրացել քրոջ` Քենդալ Ջենների հետ: Սակայն քույրերն «աստղալից» հանդիսատեսի կողմից չեն արժանացել այն վերաբերմունքին, որն ակնկալում էին:
Հանդիսատեսը սկսել է ծիծաղել այն բանից հետո, երբ Քարդաշյանն ասել է. «Իմ ընտանիքն ամենից լավ գիտի` որքան մարտահրավերներ ունի հեռուստատեսությունը նրանց համար, ովքեր իրական են»:
Քենդալն էլ, քրոջ խոսքը շարունակելով, ասել է. «Գիտենք` որքան դժվար է ներկայացնել պատմությունդ չմշակված և չխմբագրված»: Այդ ժամանակ հանդիսատեսը սկսել է ավելի ուժգին ծիծաղել:
Չնայած դահլիճի ծիծաղից հետո Քիմի և Քենդալի շփոթմունքը նկատելի է եղել, այնուամենայնիվ, նրանք շարունակել են կատարել իրենց վստահված պարտականությունը. Քիմը բացել է ծրարը և հայտարարել հաղթողի անունը:
Սակայն ծաղրն այս ամենով չի ավարտվել. այն շարունակվել է նաև առցանց հարթակում: Twitter սոցիալական կայքում օգտատերերն ակտիվորեն քննարկել են Քարդաշյանների նվաստացման թեման մրցանակաբաշխության ժամանակ:
«Եկե´ք չմոռանանք` ինչպես «Էմմի»-ի մասնակիցները ծաղրեցին Քիմին և Քենդալին, երբ վերջիններս իրենց շոուն «իրական» և «չխմբագրված» անվանեցին` հայտարարելով, որ իրենք իրենց դրսևորում են` ինչպես կան»,- գրել է օգտատերերից մեկը: