Իշխանությունների համաձայնությունը բոլորովին պարտադիր չէ, ժողովուրդը կարող է Սահմանադրությունը փոխելու նախաձեռնությամբ հանդես գալ. Անդրիաս Ղուկասյան
Մենք գտնում ենք, որ առկա են լրջագույն պատճառներ, ինչի համար անհրաժեշտ է Հայաստանում ընդունել նոր Սահմանադրություն: Այս մասին Tert.am-ի հետ զրույցում ասաց «Հայ կառուցողական կուսակցությունը» ղեկավար Անդրիաս Ղուկասյանը` անդրադառնալով Սահմանադրության փոփոխությունների վերաբերյալ ՀՀ վարչապետ Նիկոլ Փաշինյանի հայտարարությանը, ըստ որի՝ Սահմանադրությունը կենդանի օրգանիզմ է, բայց այն կարծիքին չէ, որ հիմա կառավարման համակարգի փոփոխության անհրաժեշտության առաջ ենք կանգնած: «Իմ անձնական կարծիքն այն է, որ մենք կառավարման համակարգը փոխելու անհրաժեշտություն չունենք, քանի դեռ չունենք կոնկրետ փաստարկներ, թե ինչու է դա անհրաժեշտ»,-ասել է վարչապետը:
Անդրիաս Ղուկասյանի մատնանշած առաջին պատճառը 2018 թվականի ապրիլի քաղաքացիական անհնազանդության արդյունքում տեղի ունեցած իշխանափոխությունն է: «Այն որպես հեղափոխություն իր ավարտը կունենա նոր Սահմանադրական կարգ հաստատելու ժամանակ, մինչ այդ մենք ունենք իշխանափոխություն»,-ասաց նա:
Ինչ վերաբերում է Սահմանադրական կարգի փոփոխության անհրաժեշտությանը, նա նշեց, որ դա ծավալուն հարց է, որը բաղկացած է բազմաթիվ գործոններից, որոնցից կարևորագույնն այն է, որ ժողովրդի անմիջական իշխանության իրավունքն այսօր գործող Սահմանադրությամբ լիարժեք ամրագրված չէ: «Մասնավորապես, ժողովրդի իշխանության անմիջական ձևերը շարունակում են պայմանավորված լինել օրենքներով նախատեսված կարգավորումներով և կախված են իշխող ուժի բարի կամքից` օրինակ` հավաքների ազատությունը, ինչպես նաև անհնազանդության իրավունքը, որը նույնպես ժողովրդի սահմանադրական իրավունքն է»,-ասաց նա:
«Հաջորդ հանգամանքը տեղական ինքնակառավարման իրական երաշխիքների անհրաժեշտությունն է: Այսօրվա Սահմանադրությունը բացարձակապես Հայաստանի մարզերին որևէ երաշխիք չի թողնում, որ տվյալ տարածքներում ստեղծված տնտեսական պրոդուկտը մնա այդ տարածքներում: Այսօր Հայաստանի արտադրած տնտեսական պրոդուկտը կուտակված է Երևանում, ինչի արդյունքում անվտանգության խնդիրներ են առաջացել, քանի որ մարզերը դատարկվում են բնակչությունից»,-ասաց նա:
Անդրիաս Ղուկասյանը նշեց, որ առաջարկներով դեռ չեն դիմել իշխանությանը: «Մեր նախաձեռնությունը դեռ ձևավորման փուլում է, բայց մենք գտնում ենք, որ փաստարկները լրջագույնն են, ակնհայտ են և այստեղ մոտեցման հարց է, մարդիկ ցանկություն ունեն տեսնել այդ անհրաժեշտությունները, թե ոչ, դա կախված է քաղաքական դիրքորոշումներից»,-ասաց նա:
Ինչ վերաբերում է հարցին, թե եթե իշխանության կողմից աջակցություն չունենաք Սահմանադրությունը փոխելու հարցում, ի՞նչ քայլեր կձեռնարկեք, նա ասաց.«Ժողովուրդը ունի Սահմանադրությունը փոխելու նախաձեռնության իրավունք և քաղաքացիները կարող են միավորվել և այն սահմանադրության նախագիծը առաջարկել, որը իր մշակման փուլում կարժանանա հանրային աջակցության: Այլ կերպ ասած՝ իշխանությունների համաձայնությունը բոլորվին պարտադիր չէ այս հարցում, և հանրությունը կարող է սեփական նախաձեռնությամբ այս ոլորտում իր քաղաքական պրոդուկտը ստեղծել՝ առանց իշխանությունների հետ համագործակցելու»:
Հիշեցնենք, որ ավելի վաղ Արտախորհրդարանական մի շարք ուժեր հանդես էին եկել Հայաստանում Սահմանադրական փոփոխություններ իրականացնելու քննարկումներ սկսելու նախաձեռնությամբ: