Դեռ որևէ քննարկում չի եղել հետագա մարտավարության հետ կապված. Մ. Մելքումյանը՝ ԱԺ չգալու և քվորում չապահովելու լուրերի մասին
ԱԺ «Ծառուկյան դաշինք» խմբակցության անդամ, ԱԺ փոխնախագահ Միքայել Մելքումյանը քահ-քահ ծիծաղով արձագանքեց հարցին, թե արդյոք «Բարգավաճ Հայաստանից» դուրս գալու դիմումներ եղել են, նման տրամադրություններ կան:
«Տեղեկացված չեմ, թե առայժմ ինչ է, մինչև մի հատ չխոսեմ, չհասկանամ՝ ինչ է կատարվել, չեմ կարող ասել»,– Tert.am-ի հարցին ի պատասխան՝ ասաց Միքայել Մելքումյանը:
Փոխվարչապետ Մհեր Գրիգորյանի հետ կապված հարցին, թե, ըստ Փաշինյանի հայտարարության, նա համաձայնել է մնալ, ստացվում է, որ մյուսները չե՞ն համաձայնել, Մելքումյանն ասաց. «Ես ի՞նչ գիտեմ՝ համաձայնվե՞լ է, պետք է մի հատ իր հետ խոսեմ, որովհետև ես չեմ կարդացել, որ ինքը հստակ նման բան է ասել»։
Հիշեցնենք, որ Բաղրամյան 19 և 26 հասցեներում երեկվա դրամատիկ իրադարձություններից մեկն էլ քաղաքական ապահարզանն էր «ժամանակավոր, համաձայնության» անվանումը ստացած կառավարությունում մայիսից հետո պորտֆելներ ստացած քաղաքական ուժերին՝ «Բարգավաճ Հայաստանին» ու ՀՅԴ-ին. վարչապետ Նիկոլ Փաշինյանը հարթակից կարդաց ՀՀ արտակարգ իրավիճակների նախարար Հրաչյա Ռոստոմյանի, տնտեսական զարգացման և ներդրումների նախարար Արծվիկ Մինասյանի, էներգետիկ ենթակառուցվածքների և բնական պաշարների նախարար Արթուր Գրիգորյանի, սպորտի և երիտասարդության հարցերով նախարար Լևոն Վահրադյանի, կապի և ՏՏ նախարար Աշոտ Հակոբյանի և գյուղատնտեսության նախարար Արթուր Խաչատրյանի անունները և ասաց, որ նրանք ազատվում են աշխատանքից։
ՀՀ նախագահն էլ, ինչպես պարզվեց, համապատասխան հրամանագրերը ստորագրելն է: Ազատումները տարածվում են նաև Ծառուկյանի թիմի ու ՀՅԴ-ական մարզպետների վրա՝ Արագածոտնի մարզպետ Աշոտ Սիմոնյան, Գեղարքունիքի մարզպետ Իշխան Սաղաթելյան, Լոռու մարզպետ Հրանտ Մարգարյան, Սյունիքի մարզպետ Կարեն Համբարձումյան, Վայոց ձորի մարզպետ Արագած Սաղաթելյան, որն, ի դեպ, նախկին ՀՀԿ-ական է ու հեղափոխությունից հետո դուրս է եկել Հայաստանի Հանրապետական կուսակցությունից։
Հիշեցնենք, որ Tert.am-ի հետ զրույցում ՀՀ փոխվարչապետ Մհեր Գրիգորյանը, անդրադառնալով իր՝ վարչապետ Նիկոլ Փաշինյանի կառավարության հետ աշխատելու որոշմանը, ասել էր.
«Լինելով անկուսակցական՝ իմ պարագայում Կառավարության կազմում աշխատանքս շարունակելու որոշում կայացնելու հետ կապված որևէ կաշկանդվածություն չեմ զգում: Ընդ որում՝ կարծում եմ՝ մեր պետության համար շրջադարձային և բախտորոշ այս փուլում ցանկացած քաղաքական և պետական գործիչ պետք է առավելագույն ջանքեր գործադրի մեր երկրի կայունությունն ու հետագա անցնցում զարգացումն ապահովելու համար»:
Միքայել Մելքումյանը քահ-քահ ծիծաղեց ի պատասխան այսօրվա «Ժամանակ» օրաթերթի տեղեկատվության հարցի, թե Երևանի ավագանու ընտրություններից սկսված ԲՀԿ-ում խուճապային տրամադրություններ են՝ չեն ցանկանում առաջադրվել ՏԻՄ ընտրություններում և լքում են կուսակցությունը:
Նա նշեց, որ կուսակցությունում որևէ քննարկում չի եղել հետագա մարտավարության հետ կապված՝ արդյոք հնարավոր է, որ հետագայում չգան ԱԺ՝ քվորում չապահովելու համար: