Tesla-ն հայտնել է, որ 40 տոկոսով մեծացրել է էլեկտրամեքենաների արտադրության ծավալները
Ամերիկյան Tesla ընկերությունը 2018 թվականի առաջին եռամսյակի ընթացքում մեծացրել է թողարկվող էլեկտրամեքենաների ծավալը: Այս մասին վկայում է երեքշաբթի հրապարակված հաշվետվությունը:
Ինչպես հայտնում է ТАСС գործակալությունը, հաշվետու ժամանակահատվածում ամերիկյան ընկերությունն, ընդհանուր առմամբ, 34 494 էլեկտրամեքենա է արտադրել, որոնցից 24 728-ը՝ Model S և Model X մոդելների, 9766-ը՝ Model 3: Ընկերությունից ընդգծում են, որ ընդհանուր ցուցանիշը 40 տոկոսով ավելի բարձր է, քան 2017 թվականի չորրորդ եռամսյակի ընթացքում: Ինչպես նշվում է հաշվետվության մեջ, վերջին եռամսյակն «ամենաարդյունավետն էր Tesla-ի պատմության մեջ»:
Model 3-ի արտադրության ծավալը հաշվետու ժամանակահատվածի ընթացքում կրկնակի է մեծացել: Վերջին 7 օրում ընկերությունը 2020 էլեկտրամեքենա է թողարկել:
Հաշվետվության հրապարակումից հետո ընկերության արժեթղթերի գինն ամերիկյան ֆոնդային բորսաներում բարձրացել է 4.29 տոկոսով՝ հասնելով 263.36 դոլարի:
Հիշեցնենք, որ ավելի վաղ հաղորդվում էր, որ ընկերության բաժնետոմսերի արժեքն անկում է ապրել՝ Tesla-ի ինքնագնաց մեքենայի մասնակցությամբ վթարի լուրերի ֆոնին: