Իրաքյան Քուրդիստանի հայերը մեծմասամբ «Այո» են ասել անկախությանը
Իրաքյան Քուրդիստանի հայերը մեծամասամբ «Այո» են քվեարկել անկախության հանրաքվեի ժամանակ, այս մասին հայտնել է Իրաքյան Քուրդիստանի խորհրդարանի նախկին անդամ, Էրբիլի հայ համայնքի ներկայացուցիչ Արամ Շահին Բակոյանը` Ստամբուլի հայկական պարբերականներից «Ակօսին» տված հարցազրույցում:
Բակոյանը նշել է, որ Իրաքյան Քուրդիստանում ապրում է մոտ 4000 հայ, որոնք հիմնականում քրդախոս և արաբախոս են և հայերեն չգիտեն:
Համայնքից հանրաքվեին մասնակցելու իրավունք են ունեցել 650 հայ, որոնք մեծմասամբ կողմ են արտահայտվել անկախությանը:
Հիշեցնենք, որ Քուրդիստանում սեպտեմբերի 25-ին անցկացված հանրաքվեի ընթացքում անկախությանն «Այո» է ասել քվեարկությանը մասնակցածների 92.73 տոկոսը: «Ոչ» է քվեարկել ընտրողների 7.2 տոկոսը:
Պաշտոնական Բաղդադն Իրաքյան Քուրդիստանին վերջնագիր է ներկայացրել, ըստ որի` այն պարտավոր է երեք օրվա ընթացքում Բաղդադի կառավարմանը հանձնել բոլոր սահմանային անցակետերն ու օդանավակայանները։