Ադրբեջանի ժողովուրդը ստորանում էր իմ առաջ, որպեսզի համաձայնեմ Արցախը որպես իրենց տարածք ճանաչել. Լապշին
Բլոգեր Ալեքսանդր Լապշինը Ֆեյսբուքի իր պաշտոնական էջում պատմել է, որ Ադրբեջանի հասարակությունն իսկապես լրջորեն հավատում է և համոզված է, որ Արցախի մասին իր արած հայտարարությունը կարող է քաղաքական լուրջ նշանակություն ունենալ և «վերադարձնել իրենց Ղարաբաղը»:
«Էյ, ձեզ հետ այնտեղ ամեն ինչ նորմա՞լ է: Դուք իսկապես կարծում եք, որ ես այդքան կարևոր դե՞ր եմ խաղում արցախյան հակամարտության լուծման մեջ», - գրել է Լապշինը, ում կարծիքով ադրբեջանցիներն իսկապես նվաստացել են իր առաջ միայն այն բանի համար, որ նա Արցախը Ադրբեջանի տարածք հայտարարի:
«Ինձ իսկապես ապշեցնում է այն, թե ինչպես է Ադրբեջանի ժողովուրդը ստորանում իմ՝ Լապշինի առաջ, որպեսզի ես համաձայնեմ Արցախը որպես իրենց տարածք ճանաչել», - անկեղծանում է բլոգերը:
Նա հեգնել է ադրբեջանցիներին ու սոցցանցի իր էջում հայտարարել, որ այսօր չափից դուրս մեծահոգի է ու ադրբեջանցիներին է «նվիրում» Ալյասկան:
Նա նաև նշել է, որ Ադրբեջանի ժողովուրդը աղքատության մեջ է և վարձատրվում է ամսական միջինը 100-150 դոլարի չափով, մինչդեռ Կասպից ծովից դուրս եկած նավթային դոլարներն ուղղվում են նման նպատակներով, ինչպես օրինակ, ըստ Լապշինի, տրվեցին Բելառուսի նախագահ Լուկաշենկոյին, որը դրա դիմաց փչացրեց իր հարաբերությունները ոչ միայն Հայաստանի, այլևս Իսրայելի հետ:
Հիշեցնենք, որ սեպտեմբերի 14-ին Լապշինը լքել է Ադրբեջանի տարածքն ու մեկնել Իսրայել:
Բաքվի ծանր հանցագործությունների դատարանը բլոգեր Ալեքսանդր Լապշինին դատապարտել էր երեք տարվա ազատազրկման: Ինչպես նշվել է դատավճռում, Ալեքսանդր Լապշինը մեղավոր է ճանաչվել 318.2 հոդվածով, որը նախատեսում է պատիժ «հանցավոր խմբի կազմում Ադրբեջանի պետական սահմաններն անօրինական կերպով հատելու համար»:
Դատախազը խնդրել էր Լապշինի նկատմամբ սահմանել պատիժ՝ 6,5 տարվա ազատազրկման տեսքով:
Օրերս Ադրբեջանի նախագահ Իլհամ Ալիևը հրամանագիր է ստորագրել բլոգեր Ալեքսանդր Լապշինին ներում շնորհելու մասին:
Ռուսաստանի, Իսրայելի և Ուկրաինայի քաղաքացի հանդիսացող բլոգեր Ալեքսանդր Լապշինը ձերբակալվել է Մինսկում 2016 թվականի դեկտեմբերի 15-ին՝ Ադրբեջանի դիմումի համաձայն, և արտահանձնվել Բաքվին 2017 թվականի փետրվարի 7-ին՝ 2011 թվականի ապրիլին, 2012 թվականի հոկտեմբերին և 2016 թվականի հունիսին Արցախ այցելելու, ինչպես նաև Ադրբեջանի քաղաքականությունը քննադատելու համար:
ՀՀ արտաքին գործերի նախարարության մամուլի խոսնակ Տիգրան Բալայանը, անդրադառնալով բլոգերի արտահանձնմանը, հայտարարել էր, որ Ալեքսանդր Լապշինի հետապնդումը, Ադրբեջան նրա արտահանձնումը խոսքի ազատության և ազատ տեղաշարժի, մարդու հիմնարար իրավունքների կոպտագույն ոտնահարում է, որը կրկին անգամ ի ցույց է դնում բռնապետության և ժողովրդավարության միջև առկա խորը անդունդը։