Путин Казанда башланган балалар фольклориадасында катнашучыларны сәламләде
РФ Президенты Владимир Путин бүген Казанда башланган II Бөтенроссия балалар фольклориадасында катнашучыларга, оештыручыларга һәм кунакларга сәламләү телеграммасы юллады. Аны ТР Дәүләт Советы Рәисе Фәрит Мөхәммәтшин укыды.
«Безнең уникаль тарихи, мәдәни, рухи мирасыбызга сакчыл мөнәсәбәт – дәүләтнең төп өстенлекләреннән берсе. Халык сәнгате чорлар һәм буыннар бәйләнешен саклый, кешедә туган илгә мәхәббәт, милли традицияләр һәм йолаларга хөрмәт тәрбияли», - диелә дәүләт башлыгы мөрәҗәгатендә.
«Шунысы куанычлы - сезнең искиткеч проектыгыз гамәлгә ашырылды һәм елдан-ел үз миссиясе белән илебезнең төрле төбәкләреннән талантлы егетләрне берләштерә, яшь катнашучылар өчен чын дуслык һәм иҗади аралашу бәйрәменә әверелә», - дип өстәде ул.
«Чын йөрәктән чыккан җырлар, фольклор, бию, хор коллективларының чыгышлары беркемне дә битараф калдырмас, барлык артистлар һәм тамашачылар күңелендә озак сакланыр дип ышанам», - диде Владимир Путин һәм II Бөтенроссия балалар фольклориадасына катнашы булган һәркемгә уңышлар теләде.
Элегрәк «Татар-информ» агентлыгы Россиянең 80 төбәгеннән фольклориадага килгән коллективларның Казан Кремле буйлап узуы хакында хәбәр иткән иде. Чарада катнашучылар берничә көн дәвамында Иннополис, Апас, Яшел Үзән, Лаеш һәм Биектауда концерт куячак.