Каюм Насыйри музеенда татарлар 100 ел элек бәйрәм иткән Яңа ел тамашасын күрсәтәчәкләр
Быелның 22 декабреннән 2024 елның 10 гыйнварына кадәр Татарстан Милли музее филиалы – Каюм Насыйри музеенда татарлар 100 ел элек бәйрәм иткән Яңа ел тамашасын күреп булачак. Музей кунаклары теләгән вакытта килә ала.
«Каюм Насыйри музеенда Яңа ел чаралары уздырыла. Тематикасы аерыла: музеебызда татарча Яңа ел үткәрәчәкбез. Ни өчен татарлар Яңа елны уздырмаган? Татар тарихына Яңа ел уздыру йоласы кайчан кергән? Чара барышында балалар Каюм Насыйри табышмакларына җаваплар табып, төрле уеннар уйнап, татлы бүләк алачак. Чара өлкәннәргә дә кызыклы булыр дип уйлыйм», - диде «Татар-информ» хәбәрчесенә Каюм Насыйри музее җитәкчесе Кадрия Хәлимова.
Аның әйтүенчә, чарада Кыш бабай белән Кар кызы булмый. «100 ел элек чарада Кыш бабай белән Кар кызы булмаган, Яңа елда туташ белән карап торучы – ир-ат катнашкан. 100 ел элек татарлар Яңа елны ничек каршы алган - без дә шулай итеп Яңа елны каршы алачакбыз. Барлык кешене чакырып калабыз», - диде ул.