Миңнеханов Казахстанны Татарстанның әйдәп баручы чит ил партнерларының берсе дип атады
2022 елда Татарстан һәм Казахстан арасында товар әйләнеше 758 млн доллар тәшкил итте, 2023 елның беренче өч ае динамикасы 45 процентка ышанычлы үсеш күрсәтә. Бу хакта Татарстан Рәисе Рөстәм Миңнеханов Казахстанның Россиядәге Гадәттән тыш һәм Тулы вәкаләтле илчесе Даурен Абаев белән очрашуда әйтте. Бу хакта республика җитәкчесе матбугат хезмәте хәбәр итә.
«Безнең илләрнең стратегик партнерлыкта аерым мөнәсәбәтләре бар. Тиз үзгәрүчән заманча дөньяның катлаулы шартларында икътисади үсешнең яңа нокталарын эзләргә кирәк, — диде Миңнеханов.— Бүген Казахстан — Татарстанның әйдәп баручы чит ил партнерларының берсе. Узган ел безнең товар әйләнеше 758 миллион доллар тәшкил итте».
Форсаттан файдаланып, Татарстан Рәисе дустанә республика җитәкчелегенә һәм халкына бүген, 30 августта, билгеләп үтелә торган Казахстан Конституциясе көне белән котлау сүзләрен җиткерде.
Даурен Абаев шулай ук Казахстан Президенты Касыйм-Җомарт Токаев исеменнән сәламләү сүзләрен җиткерде, анда Татарстанның көчле социаль-икътисади потенциалга һәм уникаль мәдәни-тарихи мираска ия булган Россия регион-лидерларының берсе булуы турында әйтелә.