Казанның Беломорская урамында 11 яшьлек кызны машина бәрдергән
Социаль челтәрләрдә Казанның Беломорская урамында машина 11 яшьлек кызны бәрдергән дигән мәгълүмат чыкты.
«Татар-информ»га Дәүләт автоинспекциясендә хәбәр итүләренчә, бүген 16.51 сәгатьтә KIA автомобиле йөртүчесе – 52 яшьлек хатын-кыз Беломорская урамындагы 106 нчы йорт каршында 11 яшьлек кызны бәрдергән.
«Бу хәл светофорсыз җәяүлеләр кичүендә булган. Юл-транспорт һәлакәтендә бала җитди җәрәхәтләр алган, сөяге сынган. Аны хастаханәгә салдылар», - дип сөйләде Казанның Дәүләт автоинспекциясендә пропаганда бүлеге җитәкчесе Алия Вәлиева.