Казан хоккейчылары җиңү белән кайта, «Ак Барс» – ЦСКА сериясе финалы Казанда узачак
Бүген «Ак Барс» - ЦСКА плей-офф сериясенең алтынчы уенында җиңүне Казан хоккейчылары яулады. Матч исәбе – 0:3. Уен Мәскәүдә узды.
Казанның «Ак Барс» һәм Мәскәүнең ЦСКА командалары Континенталь хоккей лигасының финалында көч сынаша. Гагарин кубогын дүрт җиңү яулаган команда отачак. Хәзергә ике команда исәбендә дә өчәр җиңү. Киләсе уен әлеге сезонда соңгысы булачак, җиңгән команда баш өстендә Гагарин кубогын күтәрәчәк.
«Ак Барс» Мәскәү командасына рәттән өч уенда җиңелсә дә, сериянең исәбен тигезләштерә алды.
Беренче период. Сигезенче минутта «Ак Барс» хоккейчысы Артём Галимов исәпне ачты (0:1).
Икенче период. Тугызынчы минутта, «Ак Барс» күпчелектә уйнаганда, Вадим Шипачёв гол кертте (0:2).
Өченче периодның соңгы секундларында, ЦСКА капкасын буш калдырып алты мәйдан уенчысы белән уйнаганда, «Ак Барс» һөҗүмчесе Никита Дыняк алканы буш капкага кертеп куйды (0:3).
Командалар составы:
ЦСКА
- Рейдеборн (Шарыченков);
- Окулов – Каменев – Плотников, Классон – Нестеров;
- Мамин – Соркин – Григоренко, Дыбленко – Диц;
- Слепышев – Светлаков – Карнаухов, Провольнев – Сергеев;
- Полтапов – Мингачёв – Абрамов (Панкратов), Макаров.
«Ак Барс»
- Билалов (Мифтахов);
- Воронков – Сафонов – Радулов, Адамчук – Лямкин;
- Кагарлицкий – Шипачёв – Петров, Юдин – Журавлёв;
- Галиев – Семёнов – Панюков, Лучевников – Евсеев;
- Лукоянов – Галимов – Дыняк (Терехов), Хенкель.
Киләсе уен Казанның «Татнефть Арена» боз сараенда узачак. Бу сезонның соңгы матчы 29 апрель 17:00 сәгатьтә башлана.