Йосыф хәзрәт Дәүләтшин: «Рамазан Фест»ны «татар каймагы» яшәгән урында оештырдык

Фестивальнең оештыручысы, идея авторы - Вахитов һәм Идел буе районнары мөхтәсибе Йосыф хәзрәт Дәүләтшин «Рамазан Фест» бәйрәменең быел Каюм Насыйри урамында - «татар каймагы» яшәгән урында оештырылуын әйтте.

«Күңел, йөрәк татар бистәсендә, чөнки шушы урам буйлап татар халкының «каймагы» йөргән: Шиһабетдин Мәрҗани, Галимҗан Баруди, Габдулла Тукай һ.б. Алар шунда намаз укырга барган. Бер-берсенә кунакка йөргәннәр. Бу күренешне бүген торгызасы килде», - диде ул «Татар-информ» хәбәрчесенә.

Фестиваль иң элек Сыртланова урамындагы «Калейдоскоп» паркында үткәрелә башлаган. «Кешеләрдән уңай фикерләр килгәч, ул паркка сыя алмый башладык. Аннан соң, Горький исемендәге паркка күчтек. Кеше рәхмәт әйтә. Быел Татар бистәсенә килергә булдык», - диде ул.

«Фестиваль 2018 елдан үткәрелә башлады. Быел без аны ике мәйданчыкка бүлдек, балалар мәйданчыгын аерып чыгардык. Балалар өчен аерым сәхнә эшли. Аларга уеннар оештырабыз. Быел фестивальнең темасы татар халкының тарихы белән бәйле, чөнки Иске татар бистәсендә уздырабыз. Шуңа күрә барлык катнашучылар татар милли киемнәреннән», - дип аңлатты Кабан арты мәчете имам-хатыйбының укыту-тәрбия эшләре буенча урынбасары Айгөл Махиянова.

Аның әйтүенчә, төп сәхнәдә пешекчеләр ярышачак. Аларның һәрберсе төрле рецепт буенча бәлеш пешереп алып килә, иң тәмле бәлешкә тамашачы бәя бирәчәк. «Безгә Совет чорында эшләнгән машиналар алып килделәр, балалар аңа төрле рәсемнәр ясаячак. Шулай ук, балалар һәм өлкәннәр өчен актив уеннар була», - диде ул.

«Бәйрәмдә төрле милләт вәкилләре бар, аларның катнашуы да безнең өчен бик мөһим. Без бу бәйрәмне мәчет кысаларыннан чыгарырга тырышабыз. Мөселман-татарлар өчен генә түгел, барлык дин әһелләре өчен дә булсын дип телибез, чөнки бу бәйрәмдә һәркем үзенә кызыклы чара таба ала. Кеше күбрәк булган саен бәйрәм дә күңеллерәк үтә», - ди Айгөл Махиянова.

Оештыручылар киләчәктә фестивальнең ел саен үткәреләчәген әйтте. «Бәлки, Салават Фәтхетдинов кебек зур җырчыларны, актерларны чакырырбыз. Бәйрәмне күләмле чара итәргә телибез. Бу бәйрәм барлык гаилә әгъзалары өчен, балалар да бәйрәмнең тәмен татысын өчен тырышабыз», - диде Айгөл Махиянова.

«Татар бистәсе милли мәдәниятләр, гореф-гадәтләр, йолаларны саклау өчен иң яхшы урын дип саныйбыз. Бәйрәмгә 5-6 мең кеше килде. Ел саен үткәрергә ниятлибез, бу урынны ошатсалар, бәлки киләчәктә дә фестиваль шунда узар», - диде «Иске шәһәр» махсус территориясе перфекты вазифаларын башкаручы Нияз Усманов.

Тәсним Әхмәтшаһова фестивальдә үз теләге белән волонтер булып катнаша. «Кабан артык мәчетенә йөрим, фестиваль турында танышым аркылы ишеттем. Бу бәйрәмнең бер өлеше булу үзе бер бәхет. Һәр волонтерның үз эше бар. Мәсәлән, мин сәхнә янында балаларга бүләкләр таратуда катнашам», - дигән фикере белән уртаклашты ул.

Түбәтәй һәм калфаклар белән сату итүче Рөстәм Шәфигуллин үзмәшгульләргә мәйданчык биргән өчен рәхмәт әйтте. «Беренче тапкыр катнашуыбыз. Милли баш киемнәрен үз кулларыбыз белән ясыйбыз, инде биш ел булды. Моны бизнес дип атап булмас, хобби кебек. Түбәтәйләрне бик күп алалар», - диде ул.

• Фестивальдә кунаклар өчен милли эчемлекләр белән шоу, концерт программасы, татар һөнәрләре һәм милли киемнәр күргәзмәләре, мастер-класслар, фуд-кортлар оештырылды. Аниматорлар һәм балалар өчен мастер-класслар белән балалар зонасы эшли. Бәйрәм кичәсе лазер һәм яктылык тамашасы белән тәмамланачак.