Татарстан табиблары яңа туган баладан бер килограммлы шеш алган
Татарстанның Республика балалар клиник хастаханәсе табиблары яңа туган сабыйдан 1 килограмм авырлыктагы яман булмаган шеш – тератоманы алып ташлаган. Бу хакта «Татар-информ»га клиниканың матбугат хезмәтендә сөйләделәр.
Бала быел апрель аенда туган. Сабыйның ана карынында булганда ук үсеш кимчелеге ачыкланган. Шеш баланың койрык сөяге янында урнашкан. Белгечләр перинаталь консилиум үткәргәннән соң бала вакытында тусын өчен йөклелекне сакларга карар итә.
Йөклелек вакытында табиблар яралгыны җентекләп күзәтә, УЗИ үткәрә, шешнең зурлыгын контрольдә тота.
Бала туганнан соң Республика балалар клиник хастаханәсенә озатыла. Операция бүлмәсендә өч хирургтан торган киңәйтелгән бригада эшли, эш дүрт сәгать дәвам итә.
«Операция уңышлы үтте. Бала үзен яхшы хис итә. Тератомалар елына ике-өч тапкыр очрый. Алар күбрәк яки азрак булырга мөмкин, урнашу урыны яки керү катлаулылыгы белән аерылып тора», – дип сөйләде сабый балалар хирургия бүлеге мөдире Григорий Чигвинцев.
2010 елда хастаханәдә 1,8 килограммлы тератоманы алганнар. Алдагы көнне алынган шеш соңгы унөч елда зурлыгы һәм авырлыгы буенча икенче урында тора.