Киров өлкәсендә «Уйнагыз гармуннар» фестиваль-бәйгесе узды
11 февральдә Киров өлкәсендә Сосновка шәһәренең «Судностроитель» мәдәният сараенда «Уйнагыз гармуннар» фестиваль-бәйгесе узды.
Чарада 321 гармунчы, баянчы, биюче, җырчы катнашты. Иң яшь катнашучыга 7 яшь иде, иң өлкәненә – 80 яшь. Җырчы, виртуоз тальянчы, Татарстанның (2007) һәм Башкортстанның (2011) халык артисты Фән Вәлиәхмәтов чараның кунагы булды. Бөтендөнья татар конгерссы шул турыда хәбәр итә.
Фестивальнең төп максаты – милли гореф-гадәтләрне торгызу һәм татар мәдәниятен саклау, милли үзаң дәрәҗәсен күтәрү һәм киң җәмәгатьчелеккә милли мәдәниятне, телне, гореф-гадәтләрне саклау зарурлыгын аңлату.
Бәйгедә Татарстан Республикасы, Башкортстан Республикасы, Киров өлкәсе вәкилләре катнашты. Бәйгедә теләге булган һәркем катнаша алды. Җиңүчеләр төрле номинацияләрдә билгеләнде, аларга дипломнар һәм истәлекле бүләкләр тапшырылды, диелә хәбәрдә.