Минзәләдә яшьләр чыршысын ачу тантанасында алдынгы укучылар бүләкләнде
Минзәләдә тантаналы шартларда 1нче урта мәктәп янындагы мәктәп скверында чыршы утлары кабынды. Анда алдынгы укучыларны бүләкләнделәр.
Чарада катнашкан район башлыгы Айдар Салахов, «АКИБАНК» идарәсе рәисе Илдар Галяутдинов минзәләлеләрне якынлашып килүче Яңа ел бәйрәме белән котладылар.
«Әлеге чыршыны без Яшьләр чыршысы дип атыйбыз. Укуда, спортта, сәнгатьтә уңышларга ирешкән укучылар хөрмәтенә куелды да инде әлеге чыршы. Шәһәрдә беренчеләрдән булып әлеге чыршыны ачу матур бер традициягә әйләнеп бара», – диде район башлыгы Айдар Салахов.
«Сезнең барыгызны да якынлашып килүче Яңа ел белән котлыйм. Сез, балалар, илебезнең киләчәге. Бүген дә минем сезнең өчен бүләк ясыйсым килде. Район башлыгы белән киңәшләшкәч, без узып баручы елда республика, Россия күләмендә укуда, спортта, иҗатта уңышларга ирешкән укучыларга, коллективларга, аларның укытучыларына рәхмәт хатлары һәм акчалата премияләр тапшырырга киңәштек», – диде «АКИБАНК» идарәсе рәис Илдар Галяутдинове.
Илдар Галяутдинов район башлыгы Айдар Салахов белән бергә уңышлары белән аерылып торган балаларга һәм укытучыларына Рәхмәт хатлары һәм премияләр, гимназиянең Р.Муллин исемендәге театр һәм кино студиясе һәм 1нче урта мәктәпнең баскетбол комадасына сертификатлар тапшырды.
Укучылар, бәйрәмгә килгән кунаклар Кыш бабай һәм Кар кызы белән бергә Яңа ел чыршысының утларын кабызды. Бәйрәм чарасы сәнгать мәктәбе укучыларының концерт номерлары белән дәвам итте.