Түбән Кама театры «Таң вакыты» спектакле белән Новосибирск фестиваленә бара
(Казан, 14 март, «Татар-информ»). Туфан Миңнуллин исемендәге Түбән Кама татар дәүләт драма театры Новосибирскига — театр фестиваленә җыена.
«Узган елның декабрь аенда V Россиякүләм „Один. Два. Три“ камера спектакльләре фестиваленә чакыру алдык. Фестивале 2022 елның 20 -27 мартында Новосибирск шәһәрендә узачак», — дип хәбәр итә театр.
«Фестивальнең оештыру комитетына 222 заявка килгән. Конкурс программасына экспертлар советы тарафыннан сайлап алынган 12 спектакль кергән. Алар арасында безнең пластик моноспектакль дә бар», — диелгән хәбәрдә.
Сәгыйть Рәмиевнең шул исемдәге шигыре буенча куелган «Таң вакыты» спектакле 20 мартта 15.00 һәм 18.00 сәгатьләрдә Новосибирск драма театры сәхнәсендә булачак.
Спектакльнең режиссеры — Туфан Имаметдинов.
Спектакль «Бердәм Россия» партиясенең «Россиянең кече шәһәрләре театрлары» федераль проекты ярдәмендә куелды.
«Таң вакыты» спектакле биш номинациядә «Алтын битлек» премиясенә дәгъва итә. Спектакль «Кече формадагы спектакль» номинациясендә күрсәтелгән. «Алтын битлек» театр премиясе номинанты буларак, режиссер Туфан Имаметдинов, рәссам Лилия Имаметдинова, яктылык көйләүче Илшат Сәяхов, әлеге моноспектакльдә катнашкан театр артисты Алмаз Хөсәенов билгеләнгән.