Яңа ел алдыннан Яшел Үзән районының Күгеш авыл җирлегендә мәдәният йорты ачылды
(Яшел Үзән, 2 гыйнвар, «Татар-информ», «Яшел Үзән» , Алия Гаязова). Яшел Үзән районының Күгеш авыл җирлегендә өр-яңа мәдәният йорты ачылды.
Өч авылны берләштерүче Күгеш авыл җирлегендә 50 урынлык клуб төзелә дигәч, халык ризасызлык белдерде. Шулчак, Айдар авылы кызы, бүгенге көндә Казанда яшәүче журналист Фәния Әхмәтҗанова туган ягында зур мәдәният йорты булдыру теләге белән, янып-көеп йөри башлый. Ярдәм сорап КПРФның Татарстандагы башлыгы Хафиз Миргалимовка мөрәҗәгать итә.
Берничә ел дәвамында бик күп ишекләрне шакыгач, индивидуаль проект белән күп функцияле үзәк төзүгә ирешәләр.
650 кв.метр мәйданны биләүче күп функцияле үзәктә мәдәният йорты, авыл җирлеге, китапханә, музей эшләячәк. Клубта ял бүлмәсе, 199 урынга исәпләнгән концерт залы, артистлар өчен киенү-чишенү урыны, бәдрәфләр (физик мөмкинлеге чикле кешеләргә дә исәпләнгән), касса — барысы да уйланып эшләнгән. Хәтта, янәшә генә яңа ачылган спорт мәйданчыгында шөгыльләнүчеләргә юынып чыгу өчен душ кабиналарына кадәр бар.
Яңа ел алдыннан күптән көтелгән бинаның ачылуы күгешлеләр өчен зур бүләк булды. Мәдәният йорты алдындагы бизәлгән чыршы тирәли балалар район җитәкчесе, Яшел Үзән мэры Михаил Афанасьев белән әйлән-бәйлән әйләнде, башлык кулыннан бүләкләр алды.
Ә инде традицион рәвештә кызыл тасманы кискәннән соң кунаклар, алар арасында ТР икътисад министры урынбасары Равил Сираҗиев, РФ Дәүләт Думасы депутаты Илдар Гыйльметдинов, ТР Дәүләт Советы депутаты Хафиз Миргалимов һәм башкалар бар иде, күркәм бинага узды. Биредә, матур гадәт буенча, авыл халкы үз куллары белән җитештергән продукция, кул эшләнмәләреннән күргәзмә тәкъдим итте.
«Бүген без, ТР Президенты ярдәмендә тормышка ашырылган төзелеш — күп функцияле үзәк ачылышында. Биредә тырыш, уңган халык яши. Шуңа да киләчәктә яңа иҗтимагый киңлекләр — парк һәм скверлар булдыру өстендә эшләячәкбез. Якынлашып килүче Яңа ел белән сезне, ныклы сәламәтлек һәм гаиләгезгә бәхет телим», — дип, район башлыгы Михаил Афанасьев котлау сүзләрен җиткерде.