Новости за 04.08.2022

«Татнефть» ААҖ һәм Әлмәт шәһәре медсанчастендә 1 августта Татарстанның көньяк-көнчыгыш районында беренче нейрохирургия бүлеге ачылды. Нейрохирургия хезмәте 1975 елдан бүгенге көнгә кадәр травматология бүлеге составына кергән, чөнки башлыча төп бурыч - катнаш травмалары, шул исәптән баш миенә һәм умырткалыкка нисбәтле травмалар булган пациентларга ярдәм күрсәтү иде.

Александр Галибинның «Приключения маленького Бахи»/»Нәни Баха маҗаралары» балалар гаилә фильмының премьерасы Казанда – Казан халыкара мөселман киносы фестивале кысаларында була.

Татарстанда эссе һава торышы киләсе атнада да саклана. 8-9 августта көндез һава температурасы 30 градустан югары булачак.

Быел Казан халыкара мөселман киносы фестивале федераль грант откан. Грантның суммасы – 2 млн сум.

Россия Хезмәт һәм социаль яклау министрлыгында аңлатуларынча, ана капиталы акчасы белән шәхси эшмәкәрләрнең балалар бакчасы, түгәрәкләр һәм секцияләр өчен түләргә була. Белем бирү эшчәнлегенә лицензия булуы шарт булып тора.

Әмирхан Еники хикәяләре буенча эшләнгән «823 километр» нәфис фильмының кайбер кадрлары Татарстан язучылар берлегендә төшерелде.

Ике айлык дини-агарту курслары үткәннән соң Мәсәкү өлкәсенең Дзержинск шәһәр округының мөселман җәмгыяте мәктәбенең яшь укучылары ислам нигезләрен белү конкурсында катнашты. Балалар Изге Коръәнне яттан укыды, шулай ук мөселман хокукы, игелек һәм дин тоту кебек фәннәр буенча сорауларга җавап бирделәр. Бәйгедә утыз укучы катнашты һәм аларның һәркайсы тырышлык, әзерлек һәм югары белем дәрәҗәсен күрсәтте.

Озакка сузылган каты авырудан соң матбугат ветераны, «Әлмәт таңнары» газетасының беренче баш мөхәррире, язучы, Р. Төхфәтуллин, С. Сөләйманова исемендәге премияләр лауреаты Әсгать Сәлахов вафат булган.

Чаллы шәһәрендә Шамил Усманов урамындагы биш катлы йортта янгын чыккан. Бу турыда 101 янгын сагы хезмәтенә 18.40 сәгатьтә хәбәр ителгән. Өченче каттагы фатирларның берсендә балкон янган.

5-7 августта Төмән өлкәсенең Тубыл шәһәрендә Cебер татарларының «Искер җыен» XII Халыкара фестивале була. Ул Cебер татарларының милли традицияләрен яңарту һәм мәдәниятен саклау максатыннан үткәрелә.

Согуд Гарәбстаны мөхәррәм аендагы беренче рейслар өчен үз чикләрен ачты, һәм 3 августта «Мөслим» компанияләр төркеменең беренче хаҗилары Мәккәгә китте.

Быел Россия Президенты Владимир Путин белән туры элемтә аның зур матбугат конференциясе белән бергә узарга мөмкин. Мондый мөмкинлек турында дәүләт башлыгы матбугат сәркатибе Дмитрий Песков әйтте.

Кырымда эш сәфәрендә Татарстан Президенты Рөстәм Миңнеханов Кырым Республикасы һәм Севастополь мөселманнары Диния нәзарәте башлыгы Эмирали Аблаев белән очрашты. ТР җитәкчесе әңгәмәдәшне юбилее белән котлады һәм аңа рухи-әхлакый кыйммәтләрне саклауга һәм үстерүгә, тынычлыкны һәм конфессияара татулыкны ныгытуга керткән өлеше өчен «Дуслык» орденын тапшырды.

Россия этнография музее Казанда, Уфада һәм Чиләбедә Идел буе Болгар дәүләтенең ислам динен кабул итүенең 1100 еллыгына багышланган күчмә күргәзмә проектын тәкъдим итә.

Татарстанда урман янгыннары куркынычы югары булу сәбәпле, шторм кисәтүен тагын бер атнага озайттылар.

8 августта 12:30 сәгатьтә «Ярдәм» мәчетендә журналист, җәмәгәть эшлеклесе Әлмирә Әдиятуллинаны искә алачаклар.

9 июльдән башлап Татарстанда беренче тапкыр ковид йоктыруның 53 очрагы расланган.

Себер татарларының «Тылсымлы ат» әкиятләр китабы нәшер ителде. Басмага Төмән һәм Омск өлкәләрендә язылган 30 әкият кертелгән. Гаҗәп иллюстрацияләрне Алябьев исемендәге сәнгать мәктәбе укытучысы Асия Закорюкирова ясаган.

Казан мэриясе 9 августта 19.00 сәгатьтә казанлыларны һәм шәһәр кунакларын «Хәрәкәттә – бәрәкәт» проекты кысаларында Бауман урамына җырлы-биюле «Зәлидә» уенына чакыра.

Ел башыннан Татарстанда сыер итенең бәясе 19,6 процентка арткан һәм 483,6 сумга җиткән. 

Татарстан Президенты Рөстәм Миңнеханов бүген Кырым башлыгы Сергей Аксенов һәм республика мөфтие Эмирали Аблаев белән очрашты. Алар Симферопольда Җәмигъ мәчетен төзү мәсьәләләре турында фикер алышты, ул, план буенча 2,5 мең кешене сыйдырачак.

Айгөл Шәрипова – 2001 елда Төркиягә китеп, «ТРТ» дәүләт телерадиокомпаниясендә тапшырулар эшләүгә һәм алып баруга ирешкән татар кызы.

Татарстан башкаласының "Ярдәм" мәчетендә сәламәтлеге чикле кешеләр өчен махсуслаштырылган беренче спорткомплекс ачылды. Комплекска җиһазларны чит илләрдән кайтарганнар. Бу турыда яңа бинаны ачу тантанасында Казан мэры Илсур Метшин хәбәр итте.

Яңа уку елына Татарстанда 118 мәктәптә һәм уку йортларында 163 азык-төлек блогында капиталь ремонт ясала. Бу хакта бүген Казанда «Бердәм Россия» җәмәгатьчелек кабул итү бүлмәсендә РФ Дәүләт Думасы депутаты Татьяна Ларионова хәбәр итте.

Яңа уку елыннан Татарстанда сәламәтлек мөмкинлекләре чикләнгән балалар мәктәпләрдә көненә ике тапкыр бушлай кайнар аш белән тәэмин ителәчәк. Бүген РФ Дәүләт Думасы депутаты Татьяна Ларионова «Бердәм Россия» партиясенең Казандагы Иҗтимагый кабул итү бүлмәсендә шул хакта хәбәр итте.