"ლეიბორისტები" გამარჯვების შემთხვევაში, ყურძნის, ვაშლის და ციტრუსის სავალდებულო სახელმწიფო შესყიდვას აღადგენენ
ლეიბორისტული პარტია არჩევნებში გამარჯვების შემთხვევაში, ყურძნის, ვაშლის და ციტრუსის სავალდებულო სახელმწიფო შესყიდვას აღადგენენ. განცხადება ამის შესახებ შალვა ნათელაშვილმა გააკეთა და ამომრჩეველს პარტიის მაჟორიტარობის კანდიდატები წარუდგინა.
თელავი-ახმეტის მაჟორიტარობის კანდიდატი ლეიბორისტული პარტიიდან გია ორთამაშვილი იქნება, თელავი-ყვარელის მაჟორიტარობისთვის აკაკი ჯიყაშვილი იბრძოლებს, ხოლო სიღნაღი-დედოფლისწყაროს ოლქში პარტიას ნინო მაზანაშვილი წარადგენს.
"ერთხელ და სამუდამოდ წარმოგიდგენთ ღირსეულ მაჟორიტარობის კანდიდატებს, რომლებიც დაამშვენებენ პარლამენტს. ჩემი კახეთის, ჩვენი ქვეყნის გადარჩენა გადის მაჟორიტარ დეპუტატებზე. თუ ყაჩაღმა ივანიშვილმა ყაჩუღიკები გაიყვანა, არაფერი გვეშველება, ჩვენ ჩვენი მაჟორიტარები უნდა გავიყვანოთ. შარშანდელი თოვლივით გაქრა ივანიშვილის დაპირებები,"- განაცხადა ნათელაშვილმა.