რუსეთის საპატიმროში მყოფა ამერიკელმა, პოლ ველანმა CNN-ს კოლონიიდან დაურეკა და ბლინკენისთვის თხოვნით მიმართვაზე ისაუბრა
ამის შესახებ თავად ველანმა განუცხადა CNN-ს.
გასულ პარასკევს ის ჟურნალისტებს ტელეფონით ესაუბრა მორდოვეთის კოლონიიდან, სადაც სასჯელს იხდის. ველანის თქმით, მან განუცხადა ბლინკენს, რომ ის ფაქტი, რომ ის არ იყო ჩართული რუსეთთან პატიმრების ბოლო გაცვლაში, უტოლდება "ზურგზე სამიზნის დახატვას," და რომ თუ ის არ მოხვდება შემდეგ გაცვლაში, ის შეიძლება კოლონიაში მოკვდეს. ველანმა თავის ასაკსა და ავადმყოფობას გულისხმობდა.
მას სჯერა, რომ აშშ მის გათავისუფლებას ითხოვს, მაგრამ შიშობს, რომ „გეოპოლიტიკურმა საკითხებმა“ შეიძლება ამ თხოვნის გადადება, ან დღის წესრიგიდან საერთოდ ამოღება გამოიწვიოს. ველანის თქმით, რუსეთის ხელისუფლება მას „მაღალი ღირებულების“ პატიმრად მიიჩნევს და მისი გათავისუფლების სანაცვლოდ შესაბამისი ღირებულების მოპოვებას შეეცდება.
ველანმა რუსეთის მოქალაქეების, ვიქტორ ბუტისა და კოსტანტინ იაროშენკოს გათავისუფლებას აშშ-ს ხელისუფლების მიერ „შეცდომა“ უწოდა. ისინი გაცვალეს, შესაბამისად, კალათბურთელ ბრიტნი გრეინერსა და ყოფილ საზღვაო ქვეით ტრევორ რიდზე, რომლებიც გაასამართლეს რუსეთში ბრალდებებით, რომლებიც არ იყო ჯაშუშობასთან დაკავშირებული. ველანის გვარი არ იყო შეტანილი გაცვლის შესახებ ამ მორიგებაში. უილანმა თქვა, რომ ბლინკენი მას დაჰპირდა, რომ არ დაივიწყებდა.
სახელმწიფო დეპარტამენტის ოფიციალურმა წარმომადგენელმა აგვისტოში განუცხადა CNN-ს, რომ ჯერჯერობით არ ხერხდება შეთანხმების მიღწევა ველანის გაცვლის შესახებ. არაერთმა მედიასაშუალებამ ადრე გაავრცელა ინფორმაცია, რომ რუსეთი დაჟინებით მოითხოვს გაცვლაში საქართველოს მოქალაქის, ეთნიკური ჩეჩნის, ზელიმხან ხანგოშვილის გახმაურებული მკვლელობისთვის გერმანიაში მსჯავრდადებული ვადიმ კრასიკოვის ჩართვას. სახელმწიფო დეპარტამენტის სპიკერმა CNN-ს განუცხადა, რომ შეერთებულმა შტატებმა „სერიოზული შეთავაზება გაუკეთა“ რუსეთს ველანის გათავისუფლებასთან დაკავშირებით. თუ რაზეა კონკრეტულად ლაპარაკი, მას არ გაუმხელია.
ველანის თქმით, პირობები კოლონიაში, სადაც ის სამი წელია იმყოფება, გარკვეულწილად გაუარესდა, კერძოდ, უარესია საკვების ხარისხი, რაც მან რუსეთის ეკონომიკის საერთო სირთულეებს დაუკავშირა.
პოლ ველანი მოსკოვში 2018 წლის დეკემბრის ბოლოს დააკავეს. მას ჯაშუშობაში ადანაშაულებდნენ. სასამართლომ მას 16 წლით თავისუფლების აღკვეთა მიუსაჯა. ის უარყოფს დანაშაულს. ველანის გარდა რუსეთში პატიმრობაში იმყოფება The Wall Street Journal-ის ჟურნალისტი ევან გერშკოვიჩი, რომელიც ასევე ჯაშუშობაშია ბრალდებული. ცოტა ხნის წინ, რადიო თავისუფალი ევროპა/რადიო თავისუფლების ჟურნალისტი, ალსუ კურმაშევა წინასწარი დაკავების იზოლატორში მოათავსეს იმის გამო, რომ„უცხოეთის აგენტად“ არ გატარდა რეგისტრაციაში, რაც რუსეთში სისხლის სამართლის საქმეა. მას აქვს ამერიკის და რუსეთის მოქალაქეობა. ველანმა აღნიშნა, რომ ამ საქმის შესახებ რუსული მედიიდან შეიტყო.