გაეროს ადამიანის უფლებების უწყება უკრაინის სოფელ გროზაზე თავდასხმის გარემოებას შეისწავლის
5 ოქტომბერს განხორციელებულ ამ თავდასხმას, ბოლო მონაცემებით, 52 ადამიანი ემსხვერპლა.
გაეროს გენერალურმა მდივანმა, ანტონიუ გუტურეშმა მკაცრად დაგმო თავდასხმა და განაცხადა, რომ სამოქალაქო ობიექტებზე თავდასხმა აკრძალულია საერთაშორისო სამართლით. უზენაესი წარმომადგენლის უწყებაში აცხადებენ, რომ თავდასხმა განახორციელეს რუსეთის სამხედროებმა, თუმცა, არ არის „სრულად დადასტურებული".
გაეროს მისია აპირებს თავდასხმის თვითმხილველები დაკითხოს. კრემლის პრესმდივანმა, დმიტრი პესკოვმა განაცხადა, რომ რუსეთი სამოქალაქო ობიექტებს თავს არ ესხმის. თუმცა მას პირდაპირ არ უარუყვია, რომ გროზაზე თავდასხმა რუსეთის არმიამ განახორციელა.
რუსეთის თავდაცვის სამინისტროს დარტყმის შესახებ კომენტარი არ გაუკეთებია.
გროზაში თავდასხმის მსხვერპლის რიცხვი - ერთი დარტყმის შედეგად - ერთ-ერთი ყველაზე უფრო დიდია უკრაინაში რუსეთის შეჭრის შემდეგ.
გავრცელებული ცნობით, კაფე, რომელსაც სარაკეტო თავდასხმა მოხდა, ფრონტზე დაღუპული სამხედროს ხსოვნისადმი მიძღვნილი შეხვედრა იმართებოდა. გროზა ფრონტიდან 20 კილომეტრში მდებარეობს.
Amnesty International-მა თავდასხმა ომის დანაშაულად შეაფასა. დასავლეთის ქვეყნების რიგმა მკაცრად დაგმო კაფესა და მაღაზიაზე თავდასხმა. უკრაინის პრეზიდენტმა ვოლოდიმირ ზელენსკიმ მომხდარს "მიზანმიმართული ტერაქტი" უწოდა.