უკრაინის საჰაერო ძალების ცნობით, ღამის განმავლობაში 8 რუსული რაკეტა და 15 დრონი გაანადგურეს
მისი მონაცემებით, საერთო ჯამში, დააფიქსირეს მოწინააღმდეგის 33 საჰაერო სამიზნე. კერძოდ, რუსეთის სარატოვის ოლქის ქალაქ ენგელსის რაიონიდან, სტრატეგიული ავიაციის Ту-95МС ტიპის თვითმფრინავებიდან ნასროლი 7 ფრთოსანი რაკეტა(Х-101, Х-555, Х-55) და 1 ბალისტიკური რაკეტა „ისკანდერი“. ასევე, სამხრეთ და სამხრეთ-აღმოსავლეთ მიმართულებებიდან გაშვებული 25 უპილოტო საფრენი აპარატი.
სარდლობის ინფორმაციით, უკრაინის საჰაერო თავდაცვის ძალებმა გაანადგურეს 8-ვე რაკეტა და 25-დან 15 დრონი.
გასული ღამის განმავლობაში, რუსეთმა იერიში მიიტანა უკრაინის დედაქალაქ კიევსა და კიევის და ოდესის ოლქებზე.
ოდესის საოლქო-სამხედრო ადმინისტრაციის ინფორმაციით, დრონებით თავდასხმის შედეგად, იზმაილის რაიონში 1 ადამიანი დაიღუპა. დაზიანებულია საპორტო და სასოფლო-სამეურნეო ობიექტები - ელევატორები, ადმინისტრაციული შენობები და აგროსაწარმოები. იზმაილის რაიონი ოდესის ოლქის სამხრეთში, მდინარე დუნაიზე მდებარეობს. ამ რაიონის საპორტო ინფრასტრუქტურა უკრაინული ხორბლის და სხვა პროდუქტების ტრანსპორტირებისთვის გამოიყენება.
წინასწარი მონაცემებით, კიევსა და კიევის ოლქზე სარაკეტო შეტევას მსხვერპლი არ მოჰყოლია. უკრაინის საჰაერო თავდაცვის ძალების მიერ მოგერიებული რუსული რაკეტების ნამსხვრევებმა ხანძარი გამოიწვია კიევის ოლქში მდებარე ერთ-ერთ სავაჭრო ობიექტზე.