გერმანიაში ისევ გაიფიცნენ ტრაილერის ქართველი მძღოლები
„ზოგს 5-6 თვეა, კუთვნილი ხელფასი არ აუღია. ჩემი დავალიანება 9 345 ევროა, 86 ევრო მერიცხებოდა დღეში. წელიწადზე მეტია აქ ვარ, ყოველგვარი შესვენების გარეშე ვმუშაობ. პირობების გაუმჯობესებას დაგვპირდნენ, მაგრამ ახლა საერთოდ გაწყვიტა კომპანიამ ჩვენთან კონტაქტი“, - ამბობს რადიო თავისუფლებასთან ერთ-ერთი გაფიცული, გიორგი ზენაიშვილი.
მძღოლების თქმით, ქართველების გარდა, გაფიცულია 65 უზბეკი, ტაჯიკი, ყაზახი და უკრაინელი მძღოლი. ფრანკფურტის ერთ-ერთ ავტოსადგომზე პროტესტის ნიშნად 120 სატვირთო მანქანაა გაჩერებული.
ისინი ასევე ამბობენ, რომ კომპანია მათი სხვა მძღოლებით ჩანაცვლებას ცდილობს. რადიო თავისუფლება პოლონურ კომპანიასთან დაკავშირებას ცდილობს.
საქართველოს პროფკავშირების გაერთიანების თავმჯდომარის მოადგილე რაისა ლიპარტელიანი ამბობს, რომ მათი წარმომადგენლები მძღოლებს საკვებით ეხმარებიან.
„ტენდენცია ასეთია, რომ რამდენიმე მძღოლს გადაუხადეს თანხა და ისინი დაბრუნდნენ სამსახურში, ზოგი [გაფიცული] კი ემატება. მძღოლები ცხადია, არ ატანენ ტვირთსა და სატრანსპორტო საშუალებებს. ჩვენები საკვებით ეხმარებიან. იქ მოქალაქეებიც სოლიდარულად არიან განწყობილნი", - თქვა რაისა ლიპარტელიანმა.
მძღოლებს ევროკავშირის წევრ ქვეყნებში ძირითადად გადაჰქონდათ ხის და რკინის მასალები, ასევე, სხვა არამალფუჭებადი პროდუქცია.
ეს პირველი შემთხვევა არაა, როცა პოლონურ სატვირთო გადაზიდვების კომპანია „აგმაზში" დასაქმებულები იფიცებიან. მიმდინარე წლის მარტში 200-მდე ქართველი ტრაილერის მძღოლი სამუშაო პირობებისადმი უკმაყოფილების ნიშნად გაიფიცა - ისინი მაშინაც ფრანკფურტში, ერთ-ერთ ბენზინგასამართ სადგურთან იყვნენ გაჩერებულები და ხელფასის სრულად ანაზღაურებას მოითხოვდნენ.
გაზაფხულზე გაფიცვა შეთანხმებით დასრულდა და დამსაქმებელმა ყველა გაფიცულს კუთვნილი ანაზღაურება ჩაურიცხა.