ყაზახურ საფეხბურთო გუნდს სანქცირებული რუსული ავიაკომპანიით სურდა ქუთაისში ჩამოსვლა - ავიაციის სააგენტო
ახალი განაცხადით, რეისს შეასრულებს ყაზახური ავიაკომპანია SCAT Airlines-ი. სააგენტოს ცნობით, მასზე ნებართვა, „უმოკლეს ვადაში, მომართვიდან ორ საათში, გაიცა".
საქართველოს სამოქალაქო ავიაციის სააგენტოს ცნობით, ყაზახეთიდან ჩარტერული ფრენა შესრულდება 27 ივლისს და რეისი ქუთაისის საერთაშორისო აეროპორტში 08:45 საათზე ჩამოფრინდება.
ჩარტერული რეისის თემაზე განცხადება გამოაქვეყნა ყაზახურმა საფეხბურთო კლუბმა „აქტობემ". მას არ უხსენებია სანქცირებული რუსული ავიაკომპანია. „26 ივლისს, დილით საქართველოს სამოქალაქო ავიაციის სააგენტოს წარმომადგენლებმა გამოგვიგზავნეს შეტყობინება ქუთაისის აეროპორტში თვითმფრინავის დაჯდომის უარყოფის შესახებ. ქართულ მხარესთან შემდგომმა სასწრაფო მოლაპარაკებებმა დადებითი შედეგი არ გამოიღო. საფეხბურთო კლუბი „აქტობე“ დარჩა სახლში", - აღნიშნული იყო „აქტობეს" განცხადებაში.
UEFA-ს კონფერენსლიგის მეორე საკვალიფიკაციო ეტაპის პირველი მატჩი ქუთაისის „ტორპედოსა" და „აქტობეს" შორის, 27 ივლისს, 21:00 საათზე ქუთაისში, „შენგელია არენაზე" უნდა გაიმართოს.
„ტორპედომ“ პირველ საკვალიფიკაციო ეტაპზე ბოსნია და ჰერცეგოვინის „სარაევოს" პენალტების სერიაში სძლია, მას შემდეგ, რაც ჯერ საშინაო (2:2) და შემდეგ გასვლითი მატჩი (1:1) ფრედ დაასრულა.