"სასამართლო კლანის გარეშე" - იუსტიციის უმაღლეს საბჭოსთან აქცია იმართება
"დასავლური მომავლისთვის მთავარი ბრძოლის ხაზი გადის სასამართლო ხელისუფლებასთან იმიტომ, რომ ჩვენი მთავარი სტრატეგიული პარტნიორის მხრიდან სანქცირება იყო პოლიტიკური მესიჯი. როდესაც სასამართლო კლანი გყავს, რომელიც პირდაპირ პოლიტიკურ დირექტივებს იღებს, ვერ გახდები დასავლური ოჯახის წევრი", - თქვა ენმ-ის პოლიტსაბჭოს წევრმა ირაკლი ფავლენიშვილმა.
პარლამენტში მოსამართლეთა საქმიანობაზე დროებითი საგამოძიებო კომისიის შექმნა სურს ოპოზიციას, თუმცა საპარლამენტო უმრავლესობამ "მოსამართლეებისადმი სოლიდარობის" ნიშნად პლენარულ სხდომაზე რეგისტრაციის გავლაზე უკვე სამჯერ თქვა უარი. შედეგად სასამართლო სისტემაში კორუფციული და სხვა კანონსაწინააღმდეგო ქმედებათა შესწავლის მიზნით საგამოძიებო კომისიის შექმნის საკითხზე კვორუმი ვერ შედგა.
კომისიის შექმნაზე დადგენილების კენჭისყრაზე გასატანად აუცილებელი იყო რეგისტრაცია გაევლო დეპუტატების ნახევარზე მეტს (მინიმუმ 76 ადამიანს), რაც შეუძლებელი იყო საპარლამენტო უმრავლესობის გარეშე.
საგამოძიებო კომისიის შესაქმნელად მინიმუმ 50 ხმა იყო საჭირო, რაც, სხდომის გახსნის შემთხვევაში, ოპოზიციას ჰქონდა.
"[კომისია] შეისწავლის სასამართლო სისტემაში არსებულ კორუფციულ და სხვა კანონსაწინააღმდეგო ქმედებებს, სისტემურად მიუდგება ამ პრობლემებს. გთავაზობთ როგორც ოპოზიციას, ასევე უმრავლესობას, ამ კომისიაში ერთობლივად ვიმუშაოთ, რადგან განსაკუთრებით აქტუალური გახდა ეს თემა. სამოქალაქო საზოგადოების მხრიდანაც არაერთი განცხადება გაკეთდა. სანქციებს, რომელიც აშშ-მა დაუწესა სამ მოქმედ და ერთ ყოფილ მოსამართლეს, სახელმწიფომ უნდა უპასუხოს", - თქვა 18 აპრილის სხდომაზე საკითხის წარდგენისას ოპოზიციონერმა დეპუტატმა ხათუნა სამნიძემ.