რუსეთის არმიის ჯგუფ „ცენტრს“ კადიროვის ფავორიტი გენერალი, ანდრეი მორდვიჩევი, უმეთაურებს

რუსეთის არმიის ცენტრალური სამხედრო ოლქის სარდლად ოფიციალურად დაინიშნა გენერალ-ლეიტენანტი ანდრეი მორდვიჩევი, რომელიც მანამდე ამ თანამდებობას ყოფილი სარდლის, გენერალ-პოლკოვნიკ ალექსანდრ ლაპინის გადადგომის შემდეგ, დროებით იკავებდა.




2022 წლის ივლისში, პრეზიდენტმა პუტინმა გენერალ-პოლკოვნიკ ლაპინს მიანიჭა რუსეთის გმირის წოდება, ოქტომბრის ბოლოს კი, ლაპინი დაჯგუფება „ცენტრის“ ხელმძღვანელის თანამდებობიდან გაათავისუფლეს. ამას წინ უძღოდა ჩეჩნეთის მეთაურის, კადიროვისა და კერძო სამხედრო კომპანია „ვაგნერის“ დამფუძნებლის, პრიგოჟინის მხრიდან გენერალ ლაპინის მწვავე კრიტიკა უკრაინაში არაერთი მარცხის, მათ შორის ქალაქ ლიმანიდან უკან დახევის გამო.


რუსული მედიის თანახმად, ჩეჩნეთის გავლენიანი ლიდერი უპირობოდა მხარს უჭერს გენერალ მორდვიჩევს. გასული წლის დასაწყისში, უკრაინაში ყოფნის დროს რამზან კადიროვი შეხვდა მორდვიჩევს, იმხანად მე-8 არმიის სარდალს. გენერალმა ერთ-ერთი რეგიონის ლიდერს დაათვალიერებინა არმიის შტაბი, გადაეხვია კადიროვს და კამერის წინ ასეთი სიტყვებით მიმართა: „ახმატი-რეალურია ძალაა“. ხოლო პასუხად კადრივმა მას „ყველაზე საუკეთესო სარდალი“ უწოდა.


გენერალი ანდრეი მორდვიჩევი 2011 წლიდან მეთაურობდა მე-4 ცალკეულ სატანკო ბრიგადას, 2017 წელს დაინიშნა იუჟნო-სახალინსკის გარნიზონის ხელმძღვანელად, შემდეგ იყო ცენტრალური სამხედრო ოლქის 41-ე არმიის მეთაურის პირველი მოადგილე, მოგვიანებით სამხრეთ სამხედრო ოლქში შემავალ რუსეთის მე-8 არმიას ედგა სათავეში.