CNN-ის გადამღები ჯგუფის თანახმად, არ შეინიშნება სოლედარიდან უკრაინელთა უკანდახევის ნიშნები
„ბრძოლების ეპიცენტრიდან დაახლოებით შვიდ კილომეტრზე ვართ. ისმის ქალაქის მიმართულებით არტილერიის იერიშის ხმა,“ იტყობიება კორესპონდენტი ბენ უედმენი.
ამასთან, ჟურნალისტების თქმით, უკრაინის შეიარაღებული ძალების მებრძოლები აგრძელებენ არტილერიის ტექნიკურ მომსახურებას და არ ტოვებენ ისეთ შთაბეჭდილებას, რომ გარდაუვალი უკანდახევისთვის ემზადებოდნენ.
ეს ინფორმაცია ეწინააღმდეგება სოლედარში მიმდინარე შეტაკებების შესახებ რუსეთის მხარის მიერ გავრცელებულ ცნობებს.
ოთხშაბათს დილით კერძო სამხედრო კომპანია „ვაგნერის“ დამაარსებელმა ევგენი პრიგოჟინმა განაცხადა, რომ ვაგნერელებმა სოლედარის მთელს ტერიტორიაზე დაამყარეს კონტროლი და რომ ბრძოლები მიმდინარეობს მხოლოდ ქალაქის ცენტრში.
რუსეთის მედიამ გაავრცელა ფოტო, რომელზეც პრიგოჟინი და რამდენიმე ვაგნერელი თითქოს გადაღებული არიან სოლედარის ერთ-ერთ მარილის მაღაროში.
უკრაინის გენერალურმა შტაბმა განაცხადა, რომ ფოტო სხვა ადგილზეა გადაღებული და რომ სოლედარზე რუსეთს არ დაუმყარებია სრული კონტროლი. ამასთან, უკრაინის შეიარაღებული ძალების ხელმძღვანელობა აღიარებს, რომ ქალაქისთვის მიმდინარეობს გააფთრებული ბრძოლები.
CNN-ის ჟურნალისტები ასევე იტყობინებიან, რომ ბრძოლის ველზე ნათლად ჩანს, რამხელა დახმარებას უწევს უკრაინას დასავლეთი. მათი თქმით, ეს ვლინდება ყველაფერში: სამხედროთა მომზადებაში, იარაღის ხარისხში, ტექნიკურ და სამედიცინო აღჭურვილობაში.