კობახიძის თქმით, სახელმწიფო ინსპექტორის თანამშრომლები უმუშევრები არ დარჩებიან
"ქართული ოცნების" თავმჯდომარე ირაკლი კობახიძე ამბობს, რომ საკანონმდებლო წინადადებაში შევა ცვლილებები და ჩაიწერება, რომ სახელმწიფო ინსპექტორის სამსახურის ფუნქციების გაყოფის შემდეგ იქ დასაქმებული თანამშრომლები ახალ ორ უწყებაში გადანაწილდებიან. მისი თქმით, სპეკულაციებია, რომ ინსპექტორის სამსახურს "მათთან პრობლემების" გამო შლიან.
"ჩვენთვისაც მნიშვნელოვანია [ეს საკითხი], ამ დეპარტამენტის თანამშრომლები ინარჩუნებდნენ საკუთარ პოზიციებს. დღეს გვექნება დაყენებული კონკრეტული ინიციატივები, რის საფუძველზეც შეიქმნება საკანონმდებლო გარანტია იმისთვის, რომ ადამიანებმა შეინარჩუნონ თანამდებობები იმ ორ სამსახურში...
თანამშრომლები რჩებიან თანამდებობებზე, ლონდა თოლორაიას პრემიერი სთავაზობს ანალოგიურ თანამდებობას საჯარო სამსახურში. აქედან ჩანს ჩვენი დამოკიდებულება მთლიანად ამ უწყების თანამშრომლების მიმართ", - თქვა კობახიძემ.
კანონპროექტის პარლამენტში წარდგენა დროში დაემთხვა სახელმწიფო ინსპექტორის, ლონდა თოლორაიას დეკრეტულ შვებულებაში ყოფნას. ის ამბობს, რომ მისი უწყების გაუქმებაზე რაიმე სახის კომუნიკაცია ხელისუფლების წარმომადგენლებთან არ ჰქონია.
საქართველოს პარლამენტი დაჩქარებულად განიხილავს "სახელმწიფო ინსპექტორის სამსახურის შესახებ". ამ ცვლილებების პროექტის მიხედვით, უქმდება სახელმწიფო ინსპექტორის სამსახური და იქმნება ორი უწყება, რომელშიც გამიჯნული იქნება საგამოძიებო და პერსონალური მონაცემების დამუშავების საკითხი.
კანონპროექტში, რომელიც მმართველმა პარტიამ წარადგინა, აღნიშნული იყო, რომ სამსახურის გაუქმების შემდეგ, 2022 წლის 1 მარტიდან უმუშევარი რჩებოდა ყველა თანამშრომელი და მათ ეკრძალებოდათ სასამართლოში დავა.
სახელმწიფო ინსპექტორის სამსახურის გაუქმებას სახელმწიფო ინსპექტორი ლონდა თოლორაია უწყების მიერ მიღებულ გადაწყვეტილებებს უკავშირებდა. იგივე პოზიცია აქვს საპარლამენტო ოპოზიციის ნაწილსაც.