ვატო წერეთელმა კომიტეტის სხდომაზე პრემიერს მავნე უწოდა - მას დარბაზი დაატოვებინეს
იურიდიულ საკითხთა კომიტეტის თავმჯდომარემ ანრი ოხანაშვილმა წერეთელს დარბაზი დაატოვებინა. „თქვენ ხართ უზრდელი ადამიანი, ამიტომ გაბრძანდით სხდომათა დარბაზიდან. როდესაც ზრდილობას ისწავლით, შეგიძლიათ შემოხვიდეთ. თქვენ ხართ მავნე და უზრდელი, ამიტომ გაიარეთ და გადით“, - მიმართა ოხანაშვილმა ვატო წერეთელს.
„TV პირველის" დამფუძნებელმა სიტყვით გამოსვლაში კანონპროექტთა პაკეტის დაჩქარებული წესით განხილვა „მედიის ჩაწიხვლად" შეაფასა. „მოდის ახალი წელი, მედიასაშუალებებმა წლის განრიგი და ბიუჯეტი უნდა შეადგინონ. ჰოპ-ჰოპ, უცებ შევიკრიბოთ და განვიხილოთ, რა არის, თუ არა მედიის ჩაწიხვლა“, - თქვა მან. ოხანაშვილმა ზრდილობის გამოჩენისკენ ვატო წერეთელს თავდაპირველად მისი შეკითხვის პასუხად მოუწოდა. „თქვენ თუ გითამაშიათ, ბატონო ანრი? არასდროს? ან „კრისტალზე“, ან „აჭარაზე“. რომელი გირჩევნიათ?“ - მიმართა წერეთელმა ოხანაშვილს.
დაგეგმილი საკანონმდებლო ცვლილებები კომიტეტების გაერთიანებულ სხდომაზე გააკრიტიკეს სხვა ტელეკომპანიების დამფუძნებლებმაც. „უამრავი კონტრაქტი და შეთანხმება გვაქვს უკვე ამასთან დაკავშირებით, მაგალითად, ჩვენთან ყველა გასართობ შოუს პრაქტიკულად აფინანსებს „ბეთი“. თქვენ წარმოიდგინეთ, მე, როგორ უნდა მოვასწრო ახალი სეზონისთვის, რომელიც იწყება ერთ თვეში დაახლოებით, დაკონტრაქტება, სპონსორის პოვნა და ა.შ. მარტო შემოსავლის მოკლება კი არ არის ეს ჩვენთვის, ახალი შემოსავლის მოძიების შესაძლებლობის მოსპობაც არის, - თქვა „მთავარი არხის" დამფუძნებელმა ნიკა გვარამიამ და დაამატა, - ერთწლიანი გარდამავალი ზონა მაინც გააკეთეთ ან პირველ სექტემბერს მაინც შეიყვანეთ ძალაში. მნიშვნელოვანი პოლიტიკური კონტექსტი ამას აუცილებლად მიეცემა“. როგორც გვარამია ამბობს, ეს რეგულაციები გამოიწვევს დომინოს პრინციპით ტელეარხების დახურვას.
ტელეკომპანია „ფორმულის“ გენერალური დირექტორი ზუკა გუმბარიძე კი აცხადებს, რომ დაჩქარებულ რეჟიმში საკანონმდებლო ცვლილების მიღება ერთ მიზანს ემსახურება და ეს არის კრიტიკული მედიისთვის სარეკლამო შემოსავლის შემცირება, რაც პრაქტიკულად არის მედიასაშუალებებისთვის პრობლემების შექმნა. „ასეთი ტიპის კანონები არ მიიღება ნაჩქარევად. აქ ჩართულები უნდა იყვნენ სხვადასხვა დარგის ექსპერტები. რეგულაცია უნდა იყოს იმდაგვარი, რომ ის ემსახურებოდეს საზოგადოებრივ სიკეთეს“.
13 დეკემბერს საქართველოს პარლამენტში შევიდა კანონპროექტი, რომელიც სათამაშო ბიზნესისთვის ახალი მკაცრი რეგულაციების დაწესებას ითვალისწინებს.
კანონის დამტკიცების შემთხვევაში, სათამაშო ბიზნესისათვის გადასახადები 70%-მდე გაიზრდება, აიკრძალება რეკლამა (სპონსორობის გარდა), მილიონამდე ადამიანს შეეზღუდება თამაშებზე წვდომა, ქვედა ასაკობრივი ზღვარი გაიზრდება 25 წლამდე.