გიორგი ჩალაძე: სააკაშვილი ენდობა და ემორჩილება ექიმებს
გიორგი ჩალაძის თქმით, მიხეილ სააკაშვილი ექიმებს ენდობა და სრულად მათი რეკომენდაციების მიხედვით მოქმედებს.
„ბატონი სააკაშვილი, როგორც გამოაცხადა, ენდობა ექიმებს, მათთან თანამშრომლობს. არ აცხადებს უარს მკურნალობაზე. მისი პირობები შესრულებულია. მიხეილ სააკაშვილი თავის სიტყვას ყოველთვის ასრულებს. მან თქვა, რომ შესაბამის პირობებში დაიწყებდა კვების აღდგენას. კვების აღდგენა [ხანგრძლივი შიმშილობის შემდეგ] ძალიან რთული და საშიში პროცესია. ამ ეტაპზე ის ენდობა და ემორჩილება ექიმების რეკომენდაციებს და მათ რჩევებს“, - განაცხადა გიორგი ჩალაძემ.
ასევე მისი თქმით, მალე გაირკვევა, რამდენად შესაძლებელია საქართველოში ამ ტიპის პაციენტის სრულფასოვანი შეფასება და ეფექტიანი მკურნალობის დაგეგმვა.
20 ნოემბერს, დღის მეორე ნახევარში, გორის ჰოსპიტალში მივიდნენ ჯანდაცვის სამინისტროს მიერ შექმნილი კონსილიუმის წევრი ექიმები. მიხეილ სააკაშვილის პირადი ექიმის, ნიკოლოზ ყიფშიძის განცხადებით, კონსილიუმის და გორის ჰოსპიტლის ექიმები სამკურნალო სქემას ერთობლივად შეიმუშავებენ.
ასევე ყიფშიძის ინფორმაციით, გორის სამხედრო ჰოსპიტალში იმორიგევებს რესპუბლიკური საავადმყოფოდან წარგზავნილი რეანიმატოლოგების ჯგუფი.