ხმაური იყო სოფელ ყიზილაჯლოს 48-ე საარჩევნო უბანზე
გიორგი მუმლაძის თქმით, ნაცემია აჯიმურა მურადოვი და მას ამ წუთებში გამოკვლევები უტარდება:
„საბედნიეროდ, მძიმე დაზიანებები არ აქვს, მაგრამ ის გულით ავადმყოფია. სავარაუდოდ, აქვს მაღალი წნევა, რადგან უბნიდან კანკალით გამოვიდა. ეს არის უმძიმესი ფაქტი. დღესვე უნდა მოხდეს ამ ადამიანის დაბარება გამოკითხვაზე“.
48-ე საარჩევნო უბანზე იმყოფება „ქართული ოცნების“ მაჟორიტარი დეპუტატი ზაურ დარგალი, რომელიც აცხადებს, რომ „ნაციონალური მოძრაობის“ წარმომადგენლები ადგილზე პროვოკაციების მოწყობას ცდილობენ:
„ნაციონალური მოძრაობის“ პროვოკატორების ბანდა დადის უბნებზე და ცდილობს, შექმნას პროვოკაციები. მთელმა საქართველომ უნდა იცოდეს, რომ მარნეულში არჩევნები მშვიდ გარემოში მიდის, არსად არაფერი ხდება. ვინ ვის დაარტყა, ამას სჭირდება ფაქტები, ამისთვის არსებობენ შესაბამისი უწყებები, ვინც გააკეთებს კომენტარს. კარგად მომზადებულმა პროვოკაციულმა ბანდებმა პირდაპირ მიიღეს დავალება სააკაშვილის მხრიდან, „ნაციონალური მოძრაობის“ ლიდერების მხრიდან, რომ ასე უბნებზე იარონ“.
2 ოქტომბერს საქართველოში ადგილობრივი თვითმმართველობის არჩევნები ტარდება.
ხმის უფლების მქონე მოქალაქეები ირჩევენ 64 მუნიციპალიტეტის მერებს და საკრებულოების წევრებს. პროპორციული და მაჟორიტარული წესით აირჩევა საკრებულოების სულ 2068 წევრი. 2 ოქტომბრის არჩევნებში 43 პარტია მონაწილეობს.
მერის არჩევნების პირველივე ტურში გასამარჯვებლად კანდიდატმა ხმების 50%-ზე მეტი უნდა მიიღოს. 40%-იანი ბარიერი მოქმედებს საკრებულოების მაჟორიტარი წევრების ასარჩევად.
პროპორციული სისტემით საკრებულოს წევრების ასარჩევად ყველა მუნიციპალიტეტში, გარდა თბილისისა, ბარიერი 3%-ია. თბილისის საკრებულოში მოსახვედრად პარტიებმა უნდა მიიღონ ხმების არანაკლებ 2.5%.
ამომრჩეველთა საერთო რაოდენობაა 3 497 345. საქართველოში 3 664 საარჩევნო უბანია.
2 ოქტომბრის თვითმმართველობის არჩევნებს, ევროპული საბჭოს პრეზიდენტის ინიციატივით, „ქართულ ოცნებასთან“ აპრილში ხელმოწერილი შეთანხმების დათქმის საფუძველზე რეფერენდუმად მიიჩნევს ოპოზიციური პარტიების უმეტესობა. „შარლ მიშელის დოკუმენტის“ ამ დათქმით, თუ ადგილობრივ არჩევნებში „ქართული ოცნება“ ხმების 43%-ზე ნაკლებს მიიღებს, მომავალ წელს რიგგარეშე საპარლამენტო არჩევნები უნდა ჩატარდეს. ივლისის ბოლოს, მმართველმა პარტიამ „მიშელის შეთანხმება“ ანულირებულად გამოაცხადა. მას შემდეგ „ქართული ოცნების“ ლიდერები აცხადებენ, რომ საპარლამენტო არჩევნები კონსტიტუციურ ვადაში - 2024 წელს ჩატარდება.