ვლადიმირ პუტინის თქმით, მან კორონავირუსის საწინააღმდეგო ვაქცინის მეორე კომპონენტი გაიკეთა
„იმედი მაქვს, ყველაფერი კარგად იქნება“, თქვა პუტინმა ვიდეოთათბირზე. მისი თქმით, იმედოვნებს, რომ პანდემია უკან დაიხევს, მათ შორის ვაქცინაციის წყალობით, რომელიც რუსეთში „აქტიურად ტარდება“.
იმის თაობაზე, რომ პუტინი COVID-19-ის საწინააღმდეგო ვაქცინის პირველი კომპონენტით აიცრა, 23 მარტს გახდა ცნობილი. მას აცრა საჯაროდ არ გაუკეთებია. კრემლში არ აზუსტებენ, რომელ ვაქცინაზე შეაჩერა არჩევანი რუსეთის პრეზიდენტმა. პირველი აცრისას პუტინის პრესმდივანმა დმიტრი პესკოვმა განაცხადა, რომ კრემლი შეგნებულად არ მიუთითებს ვაქცინას და აღნიშნა, რომ „სამივე რუსული ვაქცინა აბსოლუტურად სანდო და ეფექტიანია“.