ნინო სამხარაძე: დანიელსონის აქ ჩამოსვლა ახლა წყლის ნაყვა ნამდვილად არ არის

ევროკავშირის მედიატორის კრისტიან დანიელსონის საქართველოში მობრუნება მედიაციისთვის იმის ნიშანია, რომ ევროკავშირის პოლიტიკურმა ელიტამ მოლაპარაკებების პერსპექტივა დაინახა, - აღნიშნა რადიო თავისუფლების „დილის საუბრებში“ „საქართველოს პოლიტიკის ინსტიტუტის“ პოლიტიკის ანალიტიკოსმა ნინო სამხარაძემ.


„ჯერჯერობით კარგად ვერ ჩამოყალიბდა, მე მგონი, თვითონ პოლიტიკური სპექტრი, რამდენ საკითხზეა ის გამყოფი ხაზი, რომელსაც ვერცერთი პარტია ამ ეტაპზე ვერ გადავიდა, ვერ გადააბიჯა. ამ საკითხებშიც კი, როგორც ჩანს, პერსპექტივა დანახულია ევროკავშირის მხრიდან. მიუხედავად იმისა, რომ ჯერ კიდევ ძალიან ბუნდოვანია ჩვენთვის ამ შეხვედრის დეტალები, პოზიციები, ნიუანსები გვაძლევს იმის ვარაუდის საფუძველს, რომ იქ არის რაღაცა პერსპექტივა, რომ ერთ მშვენიერ დღეს ეს ორი მხარე ერთმანეთს შეხვდეს“, - განაცხადა ნინო სამხარაძემ. მისი თქმით, რადგან ევროკავშირის პოლიტიკურმა ელიტამ მოლაპარაკებების პერსპექტივა დაინახა, დანიელსონის დაგეგმილი ვიზიტი წყლის ნაყვა ნამდვილად არ იქნება:


„პირიქით, მეტად იმედიანად უნდა შევხედოთ იმიტომ, რომ ახლა არის ალბათ ყველაზე გადამწყვეტი ეტაპი მისი მისიისა, როდესაც ყველაზე მნიშვნელოვან საკითხებზე მიდის, როგორც ჩანს, მისი მისია“, - განაცხადა ნინო სამხარაძემ.




კრისტიან დანიელსონი საქართველოში დაბრუნდება, - ეს განცხადება ტვიტერზე ევროპული საბჭოს პრეზიდენტმა შარლ მიშელმა გუშინ, 22 მარტს საღამოს გააკეთა.


„შევაფასე საქართველოში კრისტიან დანიელსონის მედიაციით უკვე მიღწეული პროგრესი. კომპრომისების მიღწევის დროა საქართველოს მოქალაქეების სასარგებლოდ. ჩემი წარმომადგენელი ისევ დაბრუნდება, რომ განაგრძოს მედიაცია“, - წერს შარლ მიშელი.


შარლ მიშელი 22 მარტს შეხვდა საქართველოში თავის პირად წარმომადგენელს, კრისტიან დანიელსონს. გადაწყდა, რომ ის ამ კვირის ბოლოს ესტუმრება საქართველოს.


შარლ მიშელსა და კრისტიან დანიელსონს შორის გამართული შეხვედრის შემდეგ გავრცელებულ ცნობაში ნათქვამია, რომ დანიელსონის შუამავლობით საქართველოში მიმდინარე მოლაპარაკებების დროს პოლიტიკური პარტიებმა მიაღწეს გარკვეულ შეთანხმებას ხუთიდან სამ საკითხზე: საარჩევნო რეფორმების, მართლმსაჯულების რეფორმებისა და პარლამენტში ძალაუფლების განაწილებაზე. მაგრამ არსებობს გადაუდებელი საჭიროება, რომ პროგრესი მიღწეული იქნას ორ ყველაზე უფრო სადავო - პოლიტიზებული მართლმსაჯულებისა და მომავალი არჩევნების საკითხებში.


19 მარტს საქართველოს მმართველ პარტიასა და ოპოზიციას შორის მოლაპარაკების დასრულების შემდეგ კრისტიან დანიელსონმა თქვა, რომ საკითხების ნაწილზე ნაკლები პროგრესი იყო მიღწეული.