Дар як мурофиаи таърихӣ рӯзи 10-уми август дар Шведсия собиқ додситони эронӣ ҳозир мешавад, ки барои даст доштанаш дар ҳукми қатли ҳазорҳо дигарандешони сиёсӣ гумонбар дониста мешавад. Ин ҳодисаро зарба ба режими Ҷумҳурии Исломӣ меноманд. Ҳомид Нурӣ 60 сол дорад ва соли 1988, вақте ҳукми қатли 5 ҳазор зиндонии сиёсӣ иҷро шуд, ӯро барои содир кардани ҷиноятҳои ҷангӣ муттаҳам намуданд. Ҷониби айбдоркунанда дар додгоҳи Шведсия гуфт, моҳҳои июл ва августи соли 1988 Нурӣ дар мақоми ёвари муовини прокурор дар зиндони Гуҳардашти шаҳри Караҷ кор мекард ва метавонист дар содир кардани ҷиноятҳои сангин иштирок кунад. Вакили дифои гумонбар Томас Содерквист рӯзи 10-уми август гуфт, Нурӣ “даст доштанаш дар қатлҳои эҳтимолии соли 1988-ро рад мекунад”.
Ба иттилои телевизиони ҷамъиятии SVT, Нурӣ моҳи ноябри соли 2019 ҳангоми ба Шведсия ворид шуданаш боздошт шуд ва аз он замон то кунун дар боздоштгоҳ нигаҳдорӣ шудааст. Қонунҳои Шведсия ба мӯҳлату замони содир шудани ҷиноят аҳамият намедиҳад ва шахсони гумонбар дар содир кардани ҷиноятҳои сангини мисли куштор ваё ҷиноятҳои ҷангиро мавриди муҳокима қарор медиҳад. Додгоҳе, ки субҳи имрӯз шурӯъ шуд, интизор меравад, ки моҳи апрели соли оянда ба анҷом расад ва дар ин муддат додгоҳ бояд баёноти даҳҳо шоҳидро бишунавад.