ევროპული პერსპექტივა არ არის დასაკნინებელი და მასხარად ასაგდები, ეს სერიოზული გადაწყვეტილებაა
ევროკავშირის მიერ საქართველოს ევროპული პერსპექტივის მინიჭება, ევროინტეგრაციის გზაზე, წინ გადადგმულ ნაბიჯად მიაჩნიათ “ქართულ ოცნებაში”.
“ევროპული პერსპექტივა არაა დასაკნინებელი და მასხარად ასაგდები, როგორც ზოგიერთმა გადაწყვიტა რომ ეს გაეკეთებინა, ეს საკმაოდ სერიოზული გადაწყვეტილებაა. თემის გამოყენება პრობლემის ასაგორებლად და დაძაბულობის შესაქმნელად, აქციაზე ბევრი ხალხის მოსაყვანად, რასაკვირველია, არ უნდა დაუშვას ჩვენმა საზოგადოებამ და ზოგადად საკითხები უნდა წყდებოდეს პარლამენტში, მძაფრი კამათის პირობებში”, – აცხადებს საქართველოს პარლამენტის თავმჯდომარის პირველი მოადგილე გიორგი ვოლსკი.
ქართული ოცნების წევრი, რატი იონათამიშვილის შეფასებით, ხელისუფლება მზად არის ევროკომისიის მიერ გაცემული რეკომენდაციების ყველა პუნქტი შეასრულონ, მათ შორის პოლარიზაციის დასრულებაც, ისინი მოუწოდებენ ოპოზიციურ სპექტრს მათაც მიიღონ მონაწილეობა ამ პროცესში.
“ჩვენ ვართ მზად, რომ გადავდგათ აბსოლუტურად ყველა ნაბიჯი თითოეული პუნქტის შესასრულებლად, მათ შორის პოლარიზაციის დასრულების თვალსაზრისით და მოვუწოდებთ ყველა ჩაერთოს ამ დღის წესრიგზე მუშაობაში იმიტომ, რომ ეს არის მნიშვნელოვანი ჩვენი ქვეყნისთვის და აქ გამოჩნდება ვის ადარდებს ჩვენი ქვეყნის ევროპული მომავალი და ვის აინტერესებს მხოლოდ ის რომ საკუთარი ვიწრო პოლიტიკური ამბიციები დაიკმაყოფილოს”, – აღნიშნა რატი იონათამიშვილმა