ასეთი ისტორიული მომენტები ძალიან იშვიათია და ამ იშვიათ მომენტში, ჩვენ ვართ სამარცხვინო მხარეს – ერთადერთი და აუცილებელი ამოცანაა ამ მთავრობის მოშორება
გაოგნებული ვარ, რა სამარცხვინოდ გამოვიყურებით – ასეთი ისტორიული მომენტები ძალიან იშვიათია და ამ იშვიათ მომენტში, ჩვენ ვართ სამარცხვინო მხარეს, – ამის შესახებ პარტია „დროას“ ლიდერი, ელენე ხოშტარია სოციალურ ქსელში წერს.
ელენე ხოშტარია „ფეისბუქ-პოსტში“ აცხადებს, რომ პოლონეთი-უკრაინის საზღვრიდან ჩამოვიდა და აღფრთოვანებულია პოლონეთის მოქმედებებით.
ხოშტარია საქართველოს პოზიციას აკრიტიკებს და აცხადებს, რომ „ერთადერთი და აუცილებელი ამოცანა ამ მთავრობის მოშორებაა”.
“გაოგნებული ვარ უკრაინელების განწყობით, დისციპლინით, მორიდებულობით, უპრეტენზიობით და მადლიერების გრძნობით პატარა დახმარებაზეც კი. სავსე იყო საზღვრებიც, განაწილების პუნქტებიც პატარა ბავშვებით და არსად არ იყო ხმაური, ტირილი, ქაოსი. შუა ღამესაც კი, ბავშვები მორჩილად, წიწილებივით, მიჰყვებოდნენ დედებს. იყო მძიმე შემთხვევები, როცა დედებს ბავშვები გადმოჰყავდათ, უშვებდნენ სადმე ნათესავებთან და უკან ბრუნდებოდნენ ქმრებთან. არასდროს დამავიწყდება ამ ბავშვების სევდიანი, მაგრამ მორჩილი თვალები. იქით დედებს აწყნარებდნენ.
სრულიად აღფრთოვანებული ვარ პოლონეთის მოქმედებებით, როგორც ადამიანურ, ასევე სახელმწიფო დონეზე. საათივით აწყობილი დაახვედრეს, დახმარების, გადანაწილების სისტემა. ჩამოდგამდა თუ არა ფეხს უკრაინელი, ხვდებოდათ საბავშვო ეტლები, უფასო ინტერნეტი, სიმ ბარათები, ჰიგიენის საშუალებები, საჭმელი, საბნები, ავტობუსები, მოღიმარი პოლიციელები, სამხედროები, მოხალისეები. მთელი პოლონეთი მოცულია უკრაინით და მათი დახმარებით. ვარშავაშიც კი, როცა დადიხარ ყველგან უკრაინაა, ყველგან უკრაინის დახმარებაა. როგორც სახელმწიფომ, პოლონეთმა აჩვენა საოცარი სახე, მორალურად და პრაგმატულად. ამ ცინიკურ და გულგრილ სამყაროში უცებ ამოიფრქვა სოლიდარობის, ზრუნვის, სიკეთის, თანადგომის უდიდესი ენერგია
გაოგნებული ვარ, რა სამარცხვინოდ გამოვიყურებით საქართველო. იმ უამრავ ორგანიზებულ კარავში თუ დახმარებაში არსად ჭაჭანებს საქართველო. მეტიც აქეთ გამოხედვის ეშინიათ და გული სავსე აქვთ წყენით ჩვენს მიმართ. ასეთი ისტორიული მომენტები ძალიან იშვიათია და ამ იშვიათ მომენტში, ჩვენ ვართ სამარცხვინო მხარეს.
„ჩვენ ჩვენი მთავრობა არა ვართ” პოზიცია პირველ ეტაპზე ნამდვილად შედგა, მაგრამ ნურავინ დავიმშვიდებთ თავს ამით. ჩვენ ჩვენი მთავრობა ვართ და პასუხს ვაგებთ მათ სამარცხვინოობაზე, სანამ ისინი არიან სათავეში. უკრაინის დროშის დაკიდება კარგია და აუცილებელი, მაგრამ ის აღარ რეცხავს იმ სირცხვილს, რომ ვიტანთ ამ მთავრობას. ერთადერთი და აუცილებელი ჩვენი ამოცანა არის ამ მთავრობის მოშორება. მორალური და პრაგმატული სიმძიმე ამ ვითარებაში ამ დაჯგუფების ატანის არის უდიდესი. იქ კვდება ხალხი, იქ ყრიან ხალხს სახლებიდან, იქ უბედურება ტრიალებს და ამ უბედურებას ის ხალხი შეხვდა ღირსებით, ჩვენ-უღირსად. ეს მთავრობა უნდა შევცვალოთ!“, – წერს ელენე ხოშტარია სოციალურ ქსელში.