Լավրով. Խաղաղապահները «աշխատում են ամեն ժամ՝ իրավիճակը կարգավորելու համար»
Ելույթ ունենալով Ադրբեջանի արտգործնախարար Ջեյհուն Բայրամովի հետ բանակցություններից հետո կայացած մամուլի ասուլիսում՝ Լավրովն ասել է.
«Իհարկե, մենք դիտարկել ենք Լաչինի միջանցքում իրավիճակի սրումը։ Եվ մենք հանդես ենք գալիս նրա օգտին, որ հնարավորինս շուտ վերականգնվի լիարժեք տրանսպորտային հաղորդակցությունը եւ կարգավորվեն տարածաշրջանի հանքավայրերի արդյունահանման շուրջ տարաձայնությունները։ Թեման հին է, Խորհրդային Միությունից մնացած ժառանգություն է եւ, իհարկե, անհրաժեշտ է հնարավորինս շուտ թուլացնել դրա սրությունը։
Ռուսաստանը, ինչպես ոչ ոք, շահագրգռված է Հայաստանի եւ Ադրբեջանի միջեւ կայուն եւ արդար խաղաղությամբ եւ հակամարտությունների կանխմամբ»։
Լավրովն ափսոսանք է հայտնել հայկական կողմի՝ այսօր Մոսկվայում կայանալիք եռակողմ հանդիպմանը չմասնակցելու որոշման կապակցությամբ։
«Մենք պատրաստվում էինք այս միջոցառմանը, սակայն, ցավոք, վերջին պահին մեր հայ գործընկերները հրաժարվեցին գալ Մոսկվա՝ բացատրելով դա ստեղծված իրավիճակով։ Ափսոս, որ նման հնարավորությունը բաց թողնվեց»,- ասել է Ռուսաստանի ԱԳՆ ղեկավարը։